Aizawl: Khawzawl District SP Pu F. Lalbiakzauva chuan SDPO Khawzawl leh Khawzawl Police Station Staff-te tana buatsaih ni hnih awh tur Police Portals leh Police Station work management chungchang inzirtirna ‘In-Service Training’ chu nimin Khawzawl Police Station-ah a hawng.
In-Service Training hawnnaah hian SP chuan thu sawiin khawvel changkang zelah police-te hnathawhna kawng hrang hrangah tunlai thiamna thar ber ber hmangin portal hrang hrang an nei tawh a, heng police portal-te hi a nihna tur ang tak leh tangkai zawka hman a nih theihna turin police-te pawh anmahni an intuaithar reng a tul tih a sawi a. Thubuai kaihhnawiha court-in witness thlenga a kohnate pawh portal kaltlangin online-in kalpui vek a ni tawh dawn a, chuvangin police-te pawhin digital portal-te kalphung an hriatchian a ngai a ni a ti.
Training-ah hian Khawzawl SDPO Jeremia Vanlalhmachhuana, OC, Inspector T. Lalnuntluangi leh Sherista S.I C. Pu Biakthianghlima ten training an pe a, mi 20 vel an tel a ni