Mizoram Legislative Assembly Speaker Lalbiakzama chuan Govt. Saitual College Auditorium-ah Saitual sistrict chhunga zirlai titha chawimawina hun, Saitual MZP Headquarters-in a buatsaih chu khuallian niin a hmanpui.
Speaker Lalbiakzama chuan thu sawiin, Mizote chu lehkha zir uar mi, India ram pawha ziak leh chhiar thiam tamna lama a pakhatna hial ni thei an nih avangin, chu hmingthatna chu vawng nung zel turin zirlai kalkhawmte a fuih a. Nu leh paten neih thil hlu ber leh neihthinglungkhawnga school leh college-ah an fate lehkha an zirtir thinah an chunga lawmthu sawi let vena tha ber chu tha taka lehkha zir a, hlawhtlinna changa anmahni chawimawi let ve hi a ni, a ti.
Zirlaite tan tum dahsan a tul thu sawiin Speaker chuan, All India leh Central Service hrang hrangah Mizo thalai tam zawk an tling leh ngei turah a duh thu sawiin, tuna zirlai kalkhawmte chu an tum tisang a, hlawhtlinna sang zawk chang turin ngawrh taka zir chhunzawm zel turin a chah a. Chutihrual chuan, zirlai zawng zawng IAS an ni vek dawn lo tih hre renga, mahni kawng hrang hrangah hlawhtling tur chuan mahni inhriat chian, tuina zawng hriat, rilru puthmang dik neih, mi dang biakrawn tam, hmanhmawh loh leh ruahmanna tha neih a pawimawh tih a sawi bawk.
Zirna a ni emaw, kut hnathawh pawh ni se; thawhrimna, tumruhna leh teirei peihna tel lo chuan eng kawngah mah a hlawhtlin theih loh tih sawiin Speaker chuan, chutiang mi ni tur chuan zirlai kalkhawmte fuihin duhsakna a hlan nghal.