Congress leh Trinamool Congress (TMC) inzawm mai tur anga sawina chu tanchhan engmah nei lo a ni tih he thil hrechiangtute chuan an sawi a, party pahnihte insuih fin tura rawtna ngaihtuah engmah a awm loh thu an sawi.
Inzawm tumna a awm lo nia sawitu awm mah se party pahnihte hian kawng an hawng reng a, politic thila an ngaihven zawng pawh a inang hle tih sawi a awm mek.
Rahul Gandhi leh Abhishek Banerjee te chu an party-te thawhhona tihchak dan tur an sawi dun tawh bawk a. Hruaitu pahnihte hian eptu tangrual, INDIA thutkhawm leh tur pawh Hyderabad-ah neih an remti ti nia sawi a ni.
Congress hruaitu, Jairam Ramesh-a chuan X-ah thil sawi awmte chu a dik lo tih a tar lang a, ‘a dik lo’ tiin a sawi.
Congress hruaitu hlunten Delhi-a TMC supremo Mamata Banerjee-i an hmuh hnuah party pahnih inzawm mai theih dan tur chungchang hi sawi a ni tan a. TMC hian tun dinhmunah an chhungah harsatna an tawk mek a, an MLA 58-te chu an hel a. Rajya Sabha-a mite telin an MP-te zingah pawh hetiang thawm hi a ri chhuak mek bawk.
TMC tana harsatna dang thleng belh lehin Nilaini khan Rajya Sabha MP Sushmita Dev-i chu an party leh rorelna in sang zawka member a nihna atangin a bâng.
Thawhtanni khan Rajya Sabha MP Sukhendu Sekhar Ray-a chuan parliament rorelna in sang zawka member a nihna leh TMC-a member a nihna a bânsan tawh bawk a. MP dang pakhat, Kakoli Ghosh Dastidar-a chuan MP 20 awmna pawl khatin Lok Sabha speaker hnenah thutna hran siamsak turin ngenna an thlen tih a lo sawi tawh bawk.
“Speaker hnena thutna hran diltu MP 20 kan ni a, West Bengal hmasawnna atan sorkar laipui leh state sorkar nen tangkawpin kan thawk ho dawn a ni,” tiin ANI a hrilh.
Hetihlai hian TMC MLA hel hruaitu, Ritabrata Banerjee-a chuan a kaihhruai pawl lam chu ‘TMC dik tak’ a nih thu puangin Congress nena inzawm tumna a awm lo tih a sawi.
A kaihhruai hel lam hi MLA 58 atangin 64-ah an kai tawh tih sawiin Ritabrata chuan an party MLA leh MP tam zawkte thlawpna an dawng a, TMC hmingin an thawk chhunzawm zel dawn tih a sawi.
“TMC dik tak kan ni a. Congress nen kan insuih zawm dawn lo,” tiin Ritabrata-a hian Nilaini khan state assembly tuala thuthar lakhawmtute a kawmnaah a sawi a ni.