Mizoram sorkarin inrenchemna chikhat atan Nilaini apiangin No Official Vehicle Day a puang a, an puan atangin Nilaini vawi hnih hman tawh niin, zawm a hlawh lo ve ve niin a lang.
Sorkar laipui chuan indona avanga oil a lakluhna ram thenkhat a buai avangin inrenchemna kalpui a tul nia hriain, ramchhung state tinte chu official motor hmang tlem a, inrenchemna kalpui turin a hriattir a, hei hi zawmin Mizoram pawhin Nilaini apiang chu No Official Vehicle Day atan a puang a ni.
Mahse, hei hi zawm a hlawh em em lo thung a, traffic jam a ziaawm phah lem lo a, lirthei hmanga pisa kai an awm reng bawk. Sorkarin Nilaini apianga sorkar hnathawkte kal nan MST Bus service tura ruahmanna a siam pawh hmangtu an awm miau loh avangin a titawp zui leh ta bawk.
Ruahmanna siamtu sorkar pawhin a ruahmanna siam a hlawhtlin loh avangin a thu a zuk a, thla khat em pawh a vei hmain a ruahmanna siam zinga pakhat chu a titawp leh ta tihna a ni a, a mawhphurtu tan zaha lak chi nge, thuchhuahtu sorkar tan thu lawmawm loh tih pawh hriat a har hle.
Engpawhnise, sorkar hi a la kal chho zel ang a, thupek leh thuchhuah hrang hrang a siam leh ngei ang. Mipuite zawm tur thu a chhuah hi chu zawm a hlawh thei viau a, sorkar hnathawkte tana ruahmanna a siam erawh zawm a hlawh lo tih a chiang a, ven thawn leh ngaihchan nei chungin, zirchianna nen ruahmanna siam thin tawh se a tha hle bawk.