Aizawl: Food, Civil Supplies and Consumer Affairs Minister B. Lalchhanzova chu a pisa-ah All Mizoram Cement & Rod Dealer Association (AMCRDA) hruaitute’n Ningani khan hmuin, Mizoram chhunga rod (iron rod) lakluh size dik lo awm thin chungchang an sawipui.
AMCRDA hruaitute chuan hmun thenkhat atanga Mizoram chhunga rod lak luhah standard size pha lo a tam thu Minister hi an hrilh a. An enchian tawhnaah 10mm tur kha 8.5mm-ah te, 20mm tur kha 18.5mm-ah te, leh 16mm tur kha 14mm-a siamte a tam thu an sawi a. Rod size tlinglo hman hian insak chu a chak tur leh ngheh tur ang a thlenpui zawh loh avangin mipui tan a him lo thu thlenin, rod standard size dik chauh lakluh dan ngaihtuahpui turin Minister an ngen a ni.
Minister B. Lalchhanzova chuan standard size pha lo rod a awm ni a sawi chu pawi a tih thu leh mipuite himna a khawih avangin a lak thutak zia a sawi a. Mizoram chu lirnghing natna hmun (Seismic Zone V) a awm a nih avangin, mithiamte ruahman ang bungrua hman chu a pawimawh hle tih a sawi.
Minister hian AMCRDA thu thlen hi bawhzuiin, Home Department, Legal Metrology, PWD, YMA leh NGO dangte nen thawk hoa hmalak dan ngaihtuah turin a rang lama meeting lian zawk koh a tum thu a hrilh a. Rod dik lo lalut thinte chu finfiahna nen mipuiah tlangzarh a tul thu a sawi bawk.