- Laiu Fachhai
Mizoram hian Member of Parliament (MP) pahnih kan nei a, pakhat chu Lok Sabha MP, pakhat leh chu Rajya Sabha MP a ni. Lok Sabha MP chu mipuite’n direct-in kan thlang a, Rajya Sabha MP erawh chu Mizoram Legislative Assembly-a MLA te’n an thlang thung. Chuvangin, sawrkar siam mek party-in a ruat candidate chu Rajya Sabha MP atan thlan tlin ngei tura beisei a ni thin.
Mizoram khua leh tuite hi Mizoram chauh hawi rilru pu lovin, national leh international affairs thlenga ngaihtuahna leh contribution nei ve thei tur dinhmunah kan ding tawh a ni. Chutiang bawkin, Mizoram atanga kan thlanchhuah MP-te pawh Mizoram tan chauha thusawitu leh hnathawktu tur nia ngaih mai tur an ni lo. MP fund sem dan emaw, MP fund hmanga hna thawh turte ruahmanna emaw hi an mawhphurhna zinga pakhat chu a ni ngei a, nimahsela chu chu an hna pawimawh ber a ni lo. MP-te chu India ram pumpui tana dan leh policy siamtute an ni a, ram pum huap khua leh tui zawng zawngte tana thusawitu leh hnathawktu an ni. Chuvangin an mawhphurhna chu constituency chauh a huam lo va, India ram pumpui hmasawnna leh himna thlengin a huam a ni.
Chumi avang chuan kan MP-te chu national leh international issue leh affairs-te an hriatthiam a, a boruak leh a nghawng turte an manthiam a pawimawh hle. Parliament-ah leh committee-teah an contribution-te hian India ram hma lam kalna tur a nghawng nasa thei a ni. Chuvangin national leh international issue-te chungchangah hmathlir zau nei thei, ngaihdan fing leh fel siam thei, debate leh policy siamnaa contribution hlu tak pe thei turte kan thlan a hun tawh a ni. Mizoram aiawh tura kan tirhchhuahte chu Mizoram chauh ni lovin, India ram pumpui aiawh tura ding thei mi an nih kan ngaih pawimawh a tul tawh hle.
Chutiang mi chu kan nei em tih chuan, Pathian zarah kan nei nual a ni. National leh international level-ah pawh hmathlir zau tak nei a, contribution hlu tak pe thei tur mithiam leh mifel kan nei nual tawh. Dan (Law), Political Science leh subject hrang hranga mithiam university professor-te kan nei nual a; chutiang bawkin profession dang hrang hrangah pawh thiamna leh tawnhriat sang tak nei mi tam tak kan nei bawk. University professor-te phei chu an hna atanga bansan ngai lovin MP hna an thawk thei a, an term a tawp hnuah pawh an duh chuan an profession an chhunzawm leh thei. Chu bakah chuan, All India Services, Central Civil Services, Mizoram Civil Services leh service dang hrang hrangah hna thawh tawh, tawnhriat zau tak nei, retire tawh mithiam leh midikte pawh kan nei nual bawk. Anni hi ram rorelna, policy kalpui dan leh administrative system chungchangah tawnhriat nei tha leh hriatna thuk tak nei an nih avangin, MP hna thawh turin an tling hle a, Parliament-ah pawh contribution hlu tak an pe thei ang.
Mithiam zawng zawng MP atan an tha vek tih erawh chu a ni hran lo. MP atan tha turte chu an thiamna bakah, an tawnhriat, an article leh lehkhabu chhuah tawhte, mipui leh khawtlang tana an contribution-te, kohhran, society leh ram tana hruaitu mawhphurhna an lo chelh tawhna leh an hlawhtlinna te atangin a hriat theih a ni. Tunlai India MP leh External Affairs Minister, Dr Subrahmanyam Jaishankar hi entawn tlak tak a ni. Amah hi PhD nei leh Indian Foreign Service-a hna thawh tawh mithiam a ni mai bakah, a thiamna, a hriatna leh a tawnhriat te chu policy leh diplomacy-ah a hman tangkai thiam hle. International affairs chungchangah a hmathlir zauzia, a ngaihtuahna fiahzia leh a thusawi fingzia te avangin India leh khawvel ram hrang hrangah zah leh rinawmna a dawng a ni.
Kan state atanga kan tirhchhuah MP-te chu Hindi an hneh lo pawhin, English tal chu an hneh tha tur a ni. Tin, thu sawi thiam an nih pawh a pawimawh hle. Parliament floor-ah emaw, committee hrang hrangah emaw, English hmanga thu an sawiin prose tha, idiom, metaphor, simile, irony, satire, sarcasm, hyperbole leh rhetorical skill dangte an hmang thiam theih chuan, an thusawi chu nung zawkin a chak zawk ang a, a ngaihnawm bawk ang. Mite rilru leh thinlung pawh a hneh thei ang. Mizoram-ah chuan English hi “master-te tawng” anga ngaihna a la awm deuh avangin, tihsual hlauvin mipui hmaa English-a thu sawi kan ngam lo thin. Mahse, chutiang rilru chu kan paih a hun tawh. English pawh chu tawng dang pakhat ve mai a ni a, hmang ngam tur leh sawi ngam tur a ni. A hmangtu zawng zawngin an sawi dan a inang vek lo va, an tihsual lo vek bawk lo. Dik famkim lo mah se, rinawm taka hmang zel leh zir zel chuan hmasawnna a awm zel a ni.
Chuvangin kan aiawh tura Parliament-ah kan tirhchhuahte chu ram tan hmathlir leh thil tha ngaihtuahna nei theihte mai ni lovin, chu an hmathlir leh ngaihtuahna te chu Hindi-in emaw, English-in emaw, fiah tak leh chiang taka sawi chhuak a, zawhna leh debate-te an hmachhawn theihna turin tawng thiam leh thusawi thiam an ni a pawimawh hle. National leh international level-a thu pawimawh takte sawihohnaah pawh voice an neih theihna turin inchhiar zau a, national leh international news-te pawh an in-update zel tur a ni.
Kan MP-te chuan Parliament floor-ah emaw, an member nihna committee, board leh commission hrang hrangah emaw, thu sawi an tum zel tur a ni. Parliament-a an hlutna chu sessionah an awm (present) mai ni lovin, zawhna, debate, discussion, policy leh resolution siamnaa an contribution atangin a lang thin. MP fund hmang pawhin research leh policy lama mithiam pakhat emaw, pahnih emaw Personal Assistant emaw, Secretary atan emaw an ruai thei bawk. Chutiang mithiamte chuan fact leh figure-te zawn khawm sakin, issue pawimawhte an zirchiang ang a, ram leh hnam tana nghawng nei thei thupuiahte chu an lo ngaihtuah lawk thin ang. Chu bakah, bill an put luh turte, question an zawh turte, resolution siam turte leh Parliament-ah emaw committee-ah emaw an thusawi turte pawh tha takin an buatsaih sak thin ang. Chutiang taka team tha tak nei MP chuan amah chauhin a tih theih loh tam tak chu a tih theih dawn a, a thusawi leh a hmalakna te pawh rinawm zawkin, a chak zawk ang.
Tuna kan Lok Sabha MP leh Rajya Sabha MP thar turte pawh hian national leh international issue leh affairs-te an chhiar tam zel ang a, khawvel thil awm dan leh a boruak pawh an hrechiang zel ang. Mizoram tana thu an sawi leh hna an thawh mai bakah, India ram pumpui leh khawvel huap issue pawimawh takte chungchangah pawh hmathlir zau tak leh ngaihdan hlawk tak neiin contribution pe an tum zel tur a ni. Mizoram hi mihring tamna leh ram zauna lamah chuan India state tam zawkte aiin te deuh mah se, finna, thiamna leh ngaihtuahna lamah chuan kan hniam bik lo. Chuvangin kan aiawh tura Parliament-ah kan tirhchhuahte chuan an thiamna, an hriatna, an tawnhriat, an theihna leh an thuneihna te hmang tangkaiin national leh international discourse-ah pawh voice nei an tum zel tur a ni. An chetzia, an thiamna leh finna, an thusawi, an bill putluh leh an hmalakna te chuan Mizoram mipuite standard leh quality a lantir ang a, state zahawm kan ni dawn a ni.
A tawpah chuan, kan MP-te hi Mizoram aiawhte an ni a, anmahni hming chauh ni lovin, Mizoram leh a mipuite hming chawisâng turin mawhphurhna lian tak an nei. Chuvangin, MP ngawi reng ni lovin, Mizoram, Northeast India, national leh international issue leh affairs hrang hrangah te thu sawi thin leh contribution an nei thin tur a ni. Thu sawi ve mai tumna avang chauha sawi ni lovin, agenda leh issue-te an zirchiang ang a, point pawimawh leh tha tak takte an hmuchhuak ang a, fiah taka an sawichhuah theihna turin an inbuatsaih thin tur a ni. Treasury bench lam an thut lo pawhin leh opposition alliance member an ni lo pawhin, ram leh khua leh tuite tana tha tur issue-ah chuan sawrkar lam emaw, opposition lam emaw tih hran lovin, an rin dan leh an hriat dan anga thu sawi leh vote thlak ngam tur a ni. MP lai ni tawhte atan chuan party politik aiin ram tundinna politik an ngai pawimawh zawk tawh tur a ni. Chutiang taka hna an thawh chuan MP an nihna chuan awmze a nei ang a, an thawhrimna chuan Mizoram, India leh khawvel tana thil tha leh lawmawm tak tak te a thlen dawn a ni.