Health Minister Lalrinpuii’n MUHCS 2.0 kalpui mekah sorkar thawhpui empanelled damdawi inte chu damlo inenkawlna bill siam kawngah dik taka hma la a, bill felhlel siam lo turin a ngen.
Mizoram State Health Care Society-in ISO Certification leh AB PM-JAY hnuaia lawmman chi hnih a dawn lawmna chu Ningani khan SAD Conference Hall, MINECO-ah neih a ni a. He hun hmanpuitu Health Minister Lalrinpuii chuan, kumin April ni 1 atanga hman tan MUHCS 2.0 hnuaiah damdawi ina damlo inenkawlna bill Rs vbc 22.16 pek chhuah a ni tawh a, hemi zinga Rs vbc 13.45 hi Mizoram chhung ami a nih laiin, Rs vbc 9.20 chu State pawna empanelled damdawi in hrang hranga inenkawlna bill pek chhuah tawh a nih thu sawiin, sorkar thawhpui empanelled damdawi inte chu damlo inenkawlna bill siam kawngah dik taka hma la a, bill felhlel siam lo turin a ngen.
Health minister chuan MUHCS chu Zoram mipuite tana scheme thlamuanpui tlak a nih reng theih nan mipuite thlawpna a ngen a; la zawm ve lo damdawi inte pawh sorkar a la biak reng thu sawiin, “Min zawm ve ngei turin kan beisei,” a ti.
Lalrinpuii chuan scheme chungchanga hriat fiah duh neite tan ‘MUHCS Chhawntu’ Call Centre engtik lai pawha biak theih tura siam a nih thu a sawi a. MUHCS 2.0 hnuaiah empanelled damdawi in ni lova inenkawlna senso hmuh let theihna tur ‘Emergency Criteria’ pathum — accident avanga inzai nghal ngai, rikrum thila nunna chhanna tura inzai mamawh, leh ICU-a admit ngai nghal damlote tana siam a nih thu sawiin, mipuite hrechiang turin a chah.
MUHCS hmanga state pawn empanelled hospital-a enkawlna mamawhten Medical Refer Board an paltlang hmasak a ngaih thin thu sawiin Refer Board awm lohna khuaa chengten awlsam zawka Refer Board an hmachhawn theihna turin sorkar chuan district tina Medical Superintendent-te kaihhruaina hnuaia virtual-a damloten Medical Refer Board an hmachhawn thei tawh thu a sawi bawk.
He hlawhtlinna lawmna hunahte hian health department-a hotu liante, World Bank aiawhte bakah Mizoram Journalists Association (MJA) hruaitute leh member thahnem tak an tel a ni.