Aizawl: YMA Day vawi 91-na pualin Mizoram Larsap Governor General (Dr) Vijay Kumar Singh (Retd) chuan Mizoram mipui leh YMA member zawng zawngte duhsakna chibai a buk.
Larsap chuan YMA chu khawtlang, hnam ziarang leh nunphung chawilar leh tihhmasawn kawnga Mizorama tlawmngai pawl lian ber a nih thu a sawi a. Din a nih atanga vawiin ni thlengin midangte rawngbawlsak kawngah a khaipa ber a nih thu a sawi a. |anpui ngaite tanpui kawngah te, Mizo hnam ziarang, nunphung leh rohlu chhawmnun leh chawilar kawngah te YMA-in theihtawp a chhuah thin chu fakawm a tih thu a sawi a. Sorkar hmalaknate a hlawhtlin theih nan leh zau zawk a thlen theih nana YMA-in tha taka a tawiawm thin chu lawmawm tiin, chhawmnung zel turin mipui a chah.
Larsap chuan YMA Day pual hian Mizo mipuite chu an thil tihna apiangah ‘Tlawmngaihna’ lantir thin turin a chah a; mahni inphatna, lainatna leh mi dang tana inpekna nun chu vawng nung tlat turin a sawm a. Hnam bil hrang hrang inkara inunauna chawilar tur te, aia upa zah tur leh mahni hnam tobul nghet taka vuan tlat turin thalaite a chah a. Chutih rual chuan, ruihhlo leh a kaihhnawih laka inthiar fihlim tur leh thalaite hmakhua ngaia theihtawp chhuaha tangruala do let turin mipui sawmin, YMA kalzelna turah duhsakna sang ber a hlan a ni.