Aizawl: Hmunpui khuain YMA Day vawi 91-na Thawhtannia an lawm chu Adviser to Chief Minister Lalmuanpuia Punte, MLA chuan hmanpuiin, ram leh hnam humhalh leh zirna kawnga tan lak a tul thu a sawi.
Khuallian Lalmuanpuia Punte tunlai thalaite zingah mahni hma chauh inngaihtuahna leh midang venthawn an nei lo lutuk hi inzir an ngai tih a sawi a. Mahni chauh inngaihtuahna hi corruption chi khat a ni tih sawiin, kum upate zah leh ngaihchan thiam zir turin a chah a. Mizote chu hnam tlemte leh humhalh ngai an nih thu sawiin, thenawm state-te entawnin, ram leh hnam ral loh nan hnam hmangaihna leh humhalh phei chu dah pawimawh hmasak ber tur a nih thu a sawi.
Lalmuanpuia Punte chuan zirna kawngah pawh tan lak thar a ngaih zia sawiin, All India Service leh Central Ministry-ah te Mizo thalaite an tlin tlem tak avangin Home Department-ah pawh hnam dang officer an tam tak thu a sawi a. State sorkar hna chauh thlir lo a, CRPF leh BSF thlenga central hna hrang hrangte bawh turin thalaite a fuih a. Hmunpui khua chu YMA kumpuan ‘Ruihhlo Do’ kawnga harsatna tawk lo leh entawn tlak branch an nih avangin fakawm a tih thu a sawi bawk.