Mizorama tlawmngai pawl lian ber, Young Mizo Association (YMA) din champha vawi 91-na chu Thawhtanni khan Mizoram chhung leh pawna Branch YMA-te chuan an remchan dan angin an hmang.
YMA Day pual hian Mizoram khaw hrang hrang leh khawpui chhung branch hrang hrangte chuan khawtlang tana thil tangkai tak tak tiin he ni hi an hmang a. Sub-headquarters leh branch hrang hrangah chuan an bial chhung theuhah programme hrang hrang huaihawtin zingkar atanga mahni veng chhung tihfai hnatlang te, chhun lamah hnatlang bakah tanpui ngaite tanpuina huna hmangte an awm piah lamah, branch YMA huam chhunga section hrang hrangte tana buatsaih infiamna, intihhlimna leh hnam lam intihsiakna huaihawt an awm bakah, Central YMA hruaitute telpuia YMA Day puala hun hmang an awm a. Zan lamah YMA Day kharna inkhawm buatsaih an awm bawk.
Central YMA hruaitute pawhin ram pum mipuite hnenah chibai bukin, kumina YMA kumpuan ‘Ruihhlo Do’ chu nasa zawka bawhzui tur leh Zofate inpumkhatna vawng nung reng turin mipuite an chah a. Kumina YMA kumpuan ‘Ruihhlo Do’ a nih angin, hmun hrang hrangah ruihhlo dona kawnga tan la thar zual sauh turin hruaitute chuan YMA member-te an chah a. Central YMA President R Lalngheta chuan YMA Day puala a thusawiah ruihhlo zuartute chu chhungkua, khawtlang leh ram hmelma an nih thu a sawi a. Ruihhlo zuartute chu a tawp rat thleng umzui tur an nih thu leh an laka tlawm thei an nih loh thu a sawi.
Chief Minister Lalduhoma chuan Zoram mipuite YMA Day chibai bukin, sorkar leh YMA thawhdunna chu Zoram hmasawnna tura lungphum pawimawh tak a nih thu a sawi a. Mi tinte chu YMA thupui ngai pawimawh theuh turin a chah bawk.
Central YMA chuan YMA Day vawi 91-na pualin Mizoram pawna Mizo Welfare 16 te, Silchar Branch YMA leh Shillong Group YMA te leh Aizawl khawpui chhunga damdawi in parukah Rs. 15,000 theuhvin a sem chhuak a. Heng bakah hian Inrinni khan TBCC, Sakawrtuichhunah buhfai bag 100, TNT, Zuangtui leh OKM Home, Phunchawngah te buhfai bag 50 ve vein an sem chhuak bawk.
Tun dinhmunah Branch YMA hi 831 awmin, YMA member zawng zawng hi 5,07,267 (mipa 2,95,905 leh hmeichhia 2,11,362) an awm mek a. YMA Group 49 a awmin, YMA Sub-Hqrs. pakua, Mizoram chhunga Branch YMA awm zat hi 774 niin, Mizoram pawnah Branch YMA 57 an awm a, Aizawl khawpui chhung bika Branch YMA 111 a awm mek a ni.