Aizawl: Ramri chungchangah Chhinga Veng leh Dawrpui veng inkarah inhriatthiam lohna a thleng a. Buaina chin fel nan Aizawl Municipal Corporation (AMC) chuan Nilaini hian thutkhawm a ko.
Tun hnaia Chhinga Veng leh Dawrpui inkara ramri chungchanga inhriatthiam lohna thleng chungchangah Chhinga Veng |halai Pawl (CVTP) chuan Thawhlehnia thuchhuah siama an tar lan danin tun hmain ramri buai an neih an hre ngai lo tih an sawi a, pi leh pu atangin Electric Veng Sakawrpului atanga bazar pan chhohna leh ABC lane chu Chhinga Veng chhung a ni a. Kum 2020-21 Covid-19 len lai khan helai area-ah hian Dawrpui lamin dawr khar tura hriattirna an sem tawh a, Chhinga Veng chuan an veng chhung a nih avangin hawntir leh an ni a. Kumin March thla khan Dawrpui Local Council chuan ABC lane-a awmte chu Dawrpui Veng hming lanna signboard tar turin an hriattir leh a, June 15 khan Dawrpui hnatlangte chuan Chhinga Veng chhung thleng hna thawkin tawngkamin Chhinga Veng K|P leh YMA building-te chu ‘Dawrpui Venga awm in ni’ tiin an sawi zui a ni.
Chhinga Veng thalaite chuan hei hi hrethiam lovin nimin khan hnatlang hian an che chhuak ta tih an sawi a. Hetih lai hian zingkara hnatlang thenkhatin Armed Veng Kohhran thalai hoarding an lo lak thlak palh chu pawi an tih thu leh ngaihdam dilin an tar tha leh tawh tih an tar lang a. Chhinga Veng chu kum 1912 atanga veng hlun tak, Dawrpui atanga indang ni lovin, kohhran erawh Dawrpui atanga indang an nih avangin an veng ram humhim tur hian hma an lak zel tur thu CV|P chuan an tar lang a ni.
Hetih lai hian, Dawrpui Local Council, YMA, MHIP leh MUP hruaitute telna, Dawrpui Joint Committee chuan an veng ramri chungchanga Chhinga Veng thalaite chet danah lungawi loin Thawhlehni chhun khan Aizawl Police Station-ah FIR an theh lut.
Dawrpui Joint Committee FIR thehluh tar lan danin Thawhlehni zing khan Chhinga Veng thalai tam tak chu Dawrpui veng chhungah tlangau hial khawpin an inhawr khawm a, kum 1994 sorkar gazette zah lo takin Dawrpui veng chhunga dawrte anmahni talain an kalhsak bakah poster leh placard-te tarin kawng an zawh a, signboard thenkhat an tichhia a ni.
Hemi bakah hian Dawrpui, Saron Veng, Armed Veng, Armed Veng South, Tuithiang leh Chhinga Veng te intawm, Dawrpui-in pass an neihna Dawrpui thlanmual signboard lian leh thil tarte an la thla chu pawi an tih thu an sawi a. Police-te hnenah he thil thlenga hma la a, dawr an kalhsakte hawnsak leh thlanmual signboard-te dah let leh tura hmalaksak turin an ngen.
Veng pahnihte ramri chungchanga inhriatthiam lohna thleng chungchangah hian AMC chuan Nilaini hian ramri buai chungchangah thutkhawm a ko va. Hetah hian AMC executive corporator, ward bialtu B Lalawmpuii, official pawimawh dang te, Chhinga Veng leh Dawrpui Local Council member leh NGO aiawh te an tel ang.