Real Madrid leh Belgium goalkeeper Thibaut Courtois chuan FIFA World Cup zawhah ram aiawha inkhelh a chawlhsan tawh mai thei niin a sawi.
Kum 34 mi, Courtois thu sawi hi Belgium team-in inthlak danglamna an hmachhawn chhoh mek laia sawi a ni a, an chhuan rangkachak zinga senior player pawimawh, Kevin de Bruyne te ang pawhin an ram aiawha an vanglai hun hmawr an hnaih tawh hlawm hle a ni.
“Tunah rih chuan hma lam hun sawi hun a la ni chiah em ka hre lo va; mahse, he inelna hnuah hian chhunzawm tawh loh ka hnaih zawk ngei ang. Kum tlem tê chhung chu la khelh ka duh a, chumi rual chuan taksa duat a ngai tel bawk a. He inelna hi kan ram aiawha ka inelna hnuhnung ber a nih ka rin avangin ka chhungte pawh hetah an lo kal ve vek a ni,” tiin Courtois chuan a sawi.
Hemi a nih rual hian Real Madrid goalkeeper hian World Cup-a Belgium chet dan leh inelna zawh hnuah ama mi mal thil leh thutlukna a siam dan azirin ram aiawha la khelh chhunzawm theihna kawng erawh a la khar pumhlum lo thung.
Belgium hian World Cup khelh mekah Thawhlehni zan khan Group G inkhel hmasa berah Egypt nen 1-1-in an inhnehtawk a, an hmabakah New Zealand leh Iran an hmachhawn leh dawn a ni.