Aizawl: Aizawl West II bialtu MLA, Sports Minister Lalnghinglova Hmar chuan a bial chhunga sorkar primary school zirlaite hnenah school uniform pheikhawk a sem.
A thawhkhatna atan Govt. Primary School, Dinthar leh Govt. Gairigaon Primary School zirlai 214-te hnenah pheikhawk hi Dinthar YMA Hall-ah Nilaini khan sem a ni a, tun chawlhkar leh chawlhkar thar tir lamah sem chhunzawm a ni dawn a, bial chhung primary school zirlai 673 hnenah pheikhawk hi pek turin an ruahman.
Dinthar YMA Hall-a pheikhawk semna hunah thu sawiin LESDE Minister ni bawk Lalnghinglova Hmar chuan, Aizawl West-II a veng hrang hranga sorkar primary school zirlai zawng zawngin school uniform pheikhawk an dawng vek dawn tih a sawi a. “Sorkar school a lutte kan puihna tura sem kan ni a, kum tharah engtinnge kan inpuih leh theih ang tih pawh kan ngaihtuah leh dawn,” a ti.
Minister Lalnghinglova Hmar chuan, “Mizoram a zirtirtu tha berte awmna chu sorkar school a ni a, sorkar school-ah chuan trained teacher vek an awm. Nimahsela, a pawl hniam lamah sorkar school a inkaltir hrehna a awm thin a, Aizawlah sorkar school te hi luh nan a tha tawk a ni tih hi Aizawl West II atang hriattir kan duh.” tiin a sawi a. “Kan bial chhungah zirna tihhmasawn a tihlen zel kan tum a, hma kan sawn ve zel. Dintharah phei chuan sorkar sikul hmunhma in a zawh loh avangin zirlai pawh inlak theih loh chin a awm a, sikul tihchangtlun lamah pawh hmalak dan kan ngaihtuah ang,” a ti bawk.