Rajya Sabha MP inthlan lo awm turah Congress MLA in vote thlak lovin a hai dawn. MNF leh ZPM te chu BJP nena puan inzarzawm an nih avangin thlawp a tum lo.
Member of Parliament (Rajya Sabha) inthlan lo awm turah Congress Party chuan an MLA neihin vote thlak lovin an hai (abstain) dawn tih Mizoram Pradesh Congress Committee (MPCC) thuneitu sang Political Affairs Committee (PAC) Nilainia thukhawm chuan thutlukna a siam.
Congress PAC tar lan danin, MNF party atangin an candidate thlawp pui tura sawmna zahawm tak an dawng a, he sawmna hi uluk taka ngaihtuah a ni. Congress chuan rorel lai ZPM party te ang thoin MNF te pawh chu Mizoram, hnam, leh an sakhua himna atana hlauhawm ‘BJP nena puan inzarzawm’ an nih thu an sawi a. Parliament-ah BJP te thlawp zel tur an nih avangin, MNF candidate vote chu BJP thlawpna tluk anga ngaiin Congress party chuan an vote pui thei lo tih an sawi a ni.
Mizoram mipui leh political party hrang hrangte chu an ram, an hnam leh an sakhua tana hlauhawm BJP-ten thiam taka an aiawt chah an chhawp chhungah lut lo turin PAC chuan a ngen a. An ram, an hnam leh sakhua himna atan Congress party chuan theihtawp chhuahin hma a la zel dawn tih an sawi bawk.