Aizawl: MPCC Senior Vice President Lalnunmawia Chuaungo chuan sorkar sum a let a tamin a pung a, mipui erawh pawisa vân vangin an mangang niin a sawi.
Ningani khan MPCC Senior Vice President Lalnunmawia Chuaungo chuan Khawzawl District tlawhin thuthar thehdarhtute a kawm a. Mizoramin hmasawnna sum tam tak a dawn thin lai a, corruption avanga mi tlemte kuta sorkar sum a luh tawk tawk avanga mipui nawlpuia pawisa a van tak thu a sawi.
Lalnunmawia Chuaungo chuan kum 10 kalta (2016-17) a Mizoram budget estimate chu Rs. vbc 8,038.39 a nih laiin, kumin (2026-27) hian Rs. vbc 17,496.91-ah a kai chho tawh a, sum luh dan a let aia tamin a pung niin a sawi a. “State sorkar kuta sum awm hi dik leh fel taka hman ni se chu tun aia nasa hmasawnna kan hmu ang. Sorkar sum hlawm lian pui pui corruption avanga mi tlemte kuta a luh tak avangin mipui nawlpui chanvo a kiam a, pawisa lengvak a tlem phah a ni,” a ti.
Mizoram chu corruption tlem berna pawl thin a nih laia tun hnaia Open Tender lem leh Work Supervisor lem chi hrang hrang ni tina hriat tur awm ta hi lungchhiat thlak a tih thu sawiin, corruption hian ram a ei chhe mek a ni, a ti a. Sorkarna fawng chelhtute chu mi mal hlawkna uma mipui sum hmang lo turin a chah a. Congress party chuan milian leh mite, mi hausa leh mi rethei ang khat veka danin a hrut rualna, ‘rorelna dik leh |ha’ din a tum thu a sawi.
Senior Vice President hi MPCC leh MPYCC hruaitute’n an tawiawm a ni.