Aizawl: Assistance to State and UT for Modernization of Police (ASUMP) Scheme 2025–2026 hnuaia Mizoram Police lirthei lei thar 219-te chu Chief Minister Lalduhoma’n Ningani khan 3rd Battalion MAP Parade Ground, Mualpui-ah a vailiam.
Lirthei vai liamnaah hian Home Minister K. Sapdanga bakah police officer Aizawl-a awm Unit Head zawng zawng leh police officer AIGP leh a chung lamte an tel a ni.
ASUMP Scheme 2025–2026 hnuaiah hian sorkar laipui Ministry of Home Affairs (MHA)-a High-Power Committee chuan Mizoram Police-in tha taka hna an thawh theihna turin leh mipui rawngbawlna kawnga an tha tihchakna turin lirthei 219 lei a lo pawmpui tawh a, he police lirthei thuam thatna (modernization) atan hian Rs vbc 33.83 ruahman niin, central sorkarin Rs vbc 30.45 tumin, state sorkarin Rs vbc 3.38 a tum thung.
He scheme hnuaia lirthei thar leite hi khawvel boruak tichhe lo chi (eco-friendly) electric scooter 15, motorcycle (160 cc) 21 leh Light Motor Vehicle (LMV) 96 niin, heng LMV-te hi Scorpio N (4×4), Bolero Neo, Bolero B6, leh Bolero Camper-te an ni.
Heng bakah hian Heavy Motor Vehicle (HMV) 18, Medium Motor Vehicle (MMV) 30, leh MMV bus 24 (bus-te hi dawn belh leh tur a la ni) te an awm a, tui phurhna (water tanker) panga, tang phurhna motor (prison van) pathum leh Z+ category VVIP security duty atana hman tur bullet-resistant Toyota Fortuner pathum bakah, traffic leh tul dangah pawh hman turin motor hnuhna (towing truck) pali a tel bawk.
Heng lirthei tharte Mizoram-a Police Station awm zawng zawng 44-te hian Light Motor Vehicle thar an dawng vek ang a, Police Outpost awm zawng zawng 15-te hian Light Motor Vehicle pakhat an dawng bawk ang.
Chutih rualin, Armed Police Battalions, Specialized Units, District Executive Forces (DEFs) leh Police Training School hnenah lirtheite hi pek an ni ang a, towing truck pali te pawh hi Traffic Police leh District Executive Force (DEF) hnenah hman mai turin pek an ni ang.