Thawkkhat lai atang khan kan ramah phaia hnathawh tur hria, tanpuia, a hmun thlenga dah theite an inlar tan a, thenkhat chu rintlak tak tak an nih laiin, belhchian dawl lo leh buaizui ta an tam hle.
Hnamdang, a bikin vai kan tihte hi a tama tam ngang an ni a, fel tak tak karah sual leh rilru tha lo fe fe an awm teuh tih hi kan hriat thar a tul a, phaia hnathawh tur hriaa kawhhmuh thei rawn inlar thinte pawh kan belhchian hmasak phawt a tul tak zet a ni.
Thenkhat chuan kan mizopuite thawhpuiin, sum hmangin an rawn intawktarh thiam hle thin a, an thawhpuite lahin an chian tawh si lo, an hmuhte lahin chian bawk hek suh, buaina bulah an inhnuklut ta thin.
Hetiang hi vawiin thlengin a la awm reng a, phaia hnathawh tur hriaa intawktarhte hi kan belhchian leh kan thlithlai hmasak a fuh hle. A bik takin hetianga hnathawh tur rawn zawngte hian hmeichhia an khawm tam a, thenkhat phei chu kumtling lo an ni thin bawk.
Kan tu leh fate hi enkawl uluk ila, an thiltih hi thlithlai tha ila, phaia hnathawka kal duh an awm a nih pawhin rintlak leh rinngam an nih leh nih loh chian hmasa phawt thin ang u. Buaina a thlenin, a pawi tur ang chu a lo pawi vek tawh thin si a.