Manipur-a Kangpokpi district-ah Pathianni khan buaina a chhuak leh a, venhim hna thawktu leh tute nge an nih hriat loh ralthuam kengte inkarah mi zawn hna an thawh laiin inkahna hi a thleng a. Hetih lai hian Committee on Tribal Unity (CoTU) chuan Leimakhong-Kangchup area-a venhim hna thawktute chu tan lam nei nia sawiin duh lohna lantir nan state chhunga national highway pawimawh pahnih chu hun tiam nei lovin an dang mek.
Police-te chuan silai inbeihna hi zing dar 7.20 velah a chhuak niin an sawi a, venhim hna thawktute chu Leilon Vaiphei-ah mi dap hna thawk turin an kal a. “He thil thlengah hian eng ralthuam keng pawl nge inrawlh tih hriat a la ni lo va, thi leh hliam an awm lo,” tiin officer pakhat chuan a sawi.
Hetihlai hian Kuki-Zo pawl pakhat, CoTU chuan Pathianni khan thuchhuah siamin Imphal-Dimapur highway (NH-2) leh Imphal-Silchar highway via Jiribam (NH-37) chu tlai dar 4:00 atangin hriattirna dang a awm hma leh hma chu an dang tan dawn tih an puang.
“Venhim hna thawktute leh sorkar mawhphurhna ber chu mi tinte inthliarna awm lovin hum a ni a. Thil tih leh tih loh engah pawh tan lam neia ngaih theihna a awm chuan buaina awm mek a tizual a, remna leh muanna vawnhim tura ruatte chunga mipui rinna a tichhia a ni,” an ti.
“Venhimna dinhmun chhe zel leh civil mi pawi sawi loten hlauhawm an tawh chhunzawm zel dan thlirin CoTU chuan India sorkar, a bik takin Ministry of Home Affairs chu inrawlh nghal turin a ngen a, venhim hna zawng zawngte chu professional taka kalpui a nih theih nan, khaw harsa zawkte leh civil mite venhimna tha tawk tak neih a nih theih nan, pastor pathum leh pawi sawi lo thingtlang khaw mi 12 thah a nih dan chhuia rang taka hmalakna te a ngen a ni a. Inbeihpui dang leh hlauh vanga hmun danga insuan a awm loh nan leh tan bik neihna a awm loh nan hma la turin kan ngen a ni,” tiin thuchhuahah a tar lang a ni bawk.
CoTU chuan sorkar laipui chu thihna thlen belh zel tur venna atan thutlukna siamah te, mi tih bik nei lo tur leh tihkhawtlai lova hma la turin a ngen a ni.
Manipur-a chi leh chi inkara buaina hi Meitei leh Kuki inkar atanga intan a ni a, hnam hrang hrang a kang kai tawh a. May, 2023 atanga buaina chhuak atang khan state chhunga Meitei leh Kuki-Zo te chu an inep nasa hle a, mi 260 vel an thi tawh a, mi 60,000 vel hmun hima insawn chhuak an awm phah bawk.
Meitei-te hi a tam zawk chu Hindu an ni a, Imphal Valley-ah an cheng deuh ber a. Kristian tam zawkna, Kuki-ho hi tlang ramah an cheng ve thung a. State sorkar chuan state chhungah hnam then darhtu buffer zone a awm lo tih a sawi a, hmun derthawng erawh a awm tih a sawi.
President’s Rule hman a nih atanga kum khat dawn hnuah February thla khan sorkar thar din a ni a. Hnam inepna tidai tura hmalakna kalpui mek zingah hian hnam lian pathum aiawhte pawh an tel a ni.