Aizawl: Kar kal ta Ningani leh Zirtawpni khan Legal Metrology Enforcement chuan Aizawl khawpui chhunga dawr 13 an endik a, mineral water bottle hralh to dawr hrang hrang lakah hma an la a. He an endiknaah hian mineral water bottle ‘SURE’ tih hmingpu, a funa man tar lan (MRP) aia sanga hralh bur 672 lai an man a ni.
Legal Metrology hotute atanga thudawn danin, heng dawrkaite hian mineral water bottle Rs 8 man chu Rs 10, Rs 15 man chu Rs 20-in sumdawngte hian an zuar a. Hei hi dan, Rule 18 (2) of the Legal Metrology (Packaged Commodities) Rules, 2011 kalh a nih avangin an lakah thubuai siamsak nghal an ni a, dan anga hrem zui tur an ni ang.
Heng mineral water bottle an man takte hi Reliance Consumer Products Limited, Mumbai, Maharashtra siam leh lakluh an ni hlawm.
Legal Metrology chuan mipuite hriat tur thuchhuah siamin, India ram chhungah thil fun (Packaged item) chi reng reng, a hralh theihna sang ber neitu lamin a funa an chhut kai (MRP) aia sanga hralh hi phal a ni lo hrim hrim tih an tar lang a. He dan bawhchhiaa MRP aia sanga bungrua zuar an awm a nih chuan, mipuite chu Office of the Controller of Legal Metrology, MINECO, Khatla-ah emaw, district hrang hranga an pisa (District offices)-ah te report vat turin an chah a ni.