Aizawl: Govt. Aizawl College (GAC) Building, Sikulpuikawn chu Mizoram Presbyterian Church (Synod) kuta hlan fel a nihna thuthlung ‘Deed of Agreement’ chu Thawhlehni khan Planning & Programme Implementation (P&PI) Department Committee Room-ah Higher & Technical Education (H&TE) Department leh Mizoram Synod hruaituten an ziak.
Inremnaah hian Mizoram Synod chuan building hlut zawng, sorkar dan ding lai anga GAC building hlut zawng chhut chhuah sa cheng Rs. 3,18,92,300 chu H&TE department-ah an chhung lut a, he pawisa an chhun luh ni atang hian Sikulpuikawn-a GAC building neitu nihna chu Synod kutah hian a awm nghal a ni.
January 7, 2026-a H&TE Minister Dr. Vanlalthlana kaihhruaina hnuaia sawiho a lo nih tawh hnuah Drafting Committee dinin, March 23, 2026-ah a draft hi peih fel a ni a, Law leh Finance Department pawmpuina lak a nih hnuah nimin khan hming ziah hnan a ni ta a ni.
He inremna lehkhaah hian hming ziah hnan a nih rualin, tun thla thlenga hemi building luah tute awm zui zel dan tur chungchang pawh felfai takin ziah tel a ni bawk.
Building inhlanna lehkhaah hian Mizoram sorkar aiawhin H&TE Commissioner & Secretary Dr. Lalrozama’n hming a ziak a, Mizoram Synod aiawhin Synod Moderator Rev. John Raldosanga’n hming a ziak a. Hriatpuitu atan sorkar aiawhin H&TE Joint Secretary K. Lalhmangaihzuala leh Director Laltanpuia te, Synod aiawhin Synod Secretary Rev. B. Zohmangaiha leh Sr. Executive Secretary Rev. VL Luaia Hranleh ten hming an ziak a ni.
H&TE Minister Dr. Vanlalthlana chuan inremna thuthlung ziah a ni thei chu lawmawm a tih thu sawiin, GAC building hman zui zelna turah zirna atana hmasawnna tha zawk a nih theih a beisei thu a sawi.