Aizawl: Sports Minister Lalnghinglova Hmar chuan Thawhtanni chawhnu dar 2 khan Govt. Middle School, Tuikual North-a Basketball Court sak thar a hawng.
He basketball court hi Sports & Youth Services Department Grant-in-Aid (2025-2026) atanga Rs nuai 15 senga sak, departmental work-a thawh a ni a. A dung feet 74 leh a vang feet 42 a ni a, thirlen hungna tha tak siam a ni bawk.
Bialtu MLA ni bawk Lalnghinglova Hmar chuan basket ball court thar hawn tak chu sum hman zat leh hna hrang hrangte khaikhinin lungawithlak a tih thu a sawi a, zirtirtute leh khawtlang hruaitute chu a hmunhma hi duat taka enkawl tur leh zirlaite dah pawimawh ber thin turin a chah.
Sports Minister chuan sorkar sikulah chuan zirtirtu training chhuak an awm a. A bikin pawl sang lamah sorkar sikula luh an intihhmuh a, an inchuh nasat hle laiin a pawl hniam lamah erawh naupang an tlem. Hei hi pawl hniam lama zirtirtute an chhiat thut vang a ni lo va, intihhmuh thil a ni. Sorkar sikulah mi an luh duh nan theihtawp an chhuah zel dawn tih a sawi.