India hmun thenkhata ruah leh thlipui thawk avangin hmun tam takah lei min leh tui lian a thleng a, mi pali an thi a, chhiatna nasa tak a thlen bakah thlawhna, rel leh lirtheia inkalpawhna a tibuai a. State eng emaw zat thuneituten ruah sur nasa avang hian rikruma chet chhuah an kalpui mek.
Thawhtannia ruah sur hi Maharashtra-in a tuar na ber a, Pune-ah ruah sur vanga thi mi pathum an awm a, mi 16 thi an awm tawh.
Indian Meteorological Department (IMD) chuan Mumbai, Thane leh Raigad-ah red alert a tichhuak a, ruah nasa zawk sur tur leh thlipui na tak tleh zui turin a sawi lawk.
Ruah sur nasa vang hian Mumbai leh a chhehvela district-te chu che hlei thei lovin a siam a. Tuiin kawngpui a chim a, thingkungte a tlu a, bang leh billboard chhia eng emaw zat a awm bawk.
Mumbai-Pune Expressway-a hawn thar, ‘Missing Link’ section chu carriageway-ah concrete ban a tluk avangin fur laia enchhinna hmasa ber a hlawhchham a, hei vang hian thuneitute chuan lei min leh tui lian vangin expressway leh Mumbai-Pune highway hlui hmun thenkhat chu an khar vek a ngaih phah.
Western Railway service 40 chuang chu tui tla leh lei minin a nghawng a, rel eng emaw zat chu zin tur thulh, kawng thlak leh zin lo tura tihthut an awm nual a. Mumbai pan tur thlawhna panga pawh an kawng thlak a ni bawk.
Chief Minister Devendra Fadnavis-a chuan chhiatrupna thlenga che chhuak tur agency-te chu an che chhuak mek tih a sawi.
Hmar lam state-te pawh ruah sur hian a tibuai hle a. Himachal Pradesh-ah chuan a hma zankhuaa ruah a sur avangin tui lian, lei min leh kawngpui khar a ni a, hmeichhe naupang kum 14 mi a thi bawk.
Sabereka khuangkaihin Chamba district-a Chamba-Tissa kawngpui a dang a, Kullu-a Larji-Sainj kawngpuiah lirthei tlan dan a buai bawk a. IMD chuan Thawhtanni khan orange warning a tichhuak a. Jammu & Kashmir-ah ruah surin tui lian a thlen a, Doda-Kishtwar highway a tichhia a, lirthei tlan a tibuai a, Kishtwar-a sak mek 540 MW Kwar Hydroelectric Project bulah lirthei eng emaw zat a chim bawk.
Uttarakhand-a Gangotri Highway-ah pawh lei min a awm a, ruah sur nasa vangin lui a liam hle a. IMD chuan Thawhtanni khan yellow alert a tichhuak.
Ram lailia Chhattisgarh-ah ruah sur chhunzawm zelah hmun hniam laia tuiin kawng a chim avangin lirthei tlan a buai phah.
Shivnath leh Kharun telin lui eng emaw zat a lian a, hei vang hian State Disaster Response Force (SDRF) chu an inralring hle a. Ni thum chhung zet ruah a sur chhunzawm zel avangin Odisha chu state pumah alert-ah a awm bawk.
Rajasthan hmun thenkhat atangin ruah sur nasa leh tui lian a awm thei tih IMD chuan a tar lang bawk a. Meteorologist-te chuan Bay of Bengal atanga Jharkhand chhim lam leh Odisha hmar lam panin ruah a kal mek a, ni nga, ni ruk chhung chu ruah a sur chhunzawm dawn tih an sawi.