MZP chuan Chief Electoral Officer Garima Gupta, IAS-in Special Intensive Revision (SIR) 2026 kal meka mihring pun dan pangngai baka punna a awm lo tih a sawi chu dik tawk lova an hriat thu sawiin kum 2005 atanga 200% aia tama punna a awm nual tih an sawi.
Inrinni khan CEO hian SIR kalpui mekah enumeration phase zawh fel a nih tak avangin draft roll tar chhuah a nih rualin thuthar lakhawmtute a kawm, hetah hian SIR 2025 leh Mizorama roll ennawn kalpui hnuhnung ber, 2024-a mi nena khaikhinin Chakma khaw thenkhatah roll-a chuang an pung nasa a, 100% chuanga pungte an awm nia an sawi bakah India leh Bangladesh electoral roll-a chuang kawp an awm nia an sawi avanga uluk zawka en that an ngenna pawh district election offiver leh BLO-ten uluk takin an endik a, hetiang an hmu lo tih a sawi a ni.
Hemi chungchangah hian MZP chuan Nilaini khan an pisaah thuthar lakhawmtute kawmin draft electoral roll thar chu ngun taka an zirchian thu an sawi a, “A bikin chhim lama Chakma tamna khuate punna chu a sang hle,” an ti.
MZP chuan Sumasumy khua, kum 2005-a vote 52 awmnaah chuan draft roll hnuhnung berah vote 248 an awm tawh a, a punna hi 376.92% a nih thu an sawi a. 200% aia vote pun tamna hi khaw pasarih awmin 100% aia tama vote punna hi khaw 16 a awm niin an sawi bawk.
Khaw 95 an zirchianna atangin 50% aia vote pun tamna hi khaw 30 chuang a awm thu an sawi a, Mizo tamna khua apiangah vote punna hi a hniam a, heng khuaah hian 10-20% bakin a pung lo niin an sawi.
MZP chuan CEO Gupta-i chu SIR 2026 kalpui mekah ngaihtuahna a seng tawk lova an ngaih thu an sawi a, office a luahlum tawk lo tiin roll buaipui fel a nih hma chu a hna hi tha taka vil turin an phut thu an sawi bawk.
Zirlai pawl hian MLA bial pangaah mapping an ti tha tawk lo tih an sawi a, July 4 atanga August 4 inkara vote nei thei lote hming paih leh inthun thar duh leh leh siam that (claims & objection) tih huna hearing neih turah ERO, AERO leh BLO te chu fimkhur taka hma la turin an ngen a, YLA leh Chakma zirlaite nen pawh hemi vil tur hian an thawkho dawn tih an sawi bawk.