Hapta khat awh tur, India hmarchhak state leh Mizoram hmun hrang hrang atanga kalkhawm kutthemthiamten an thil siam an pho chhuahna, Zo fair (Aadhi Bazaar) chu Chief Minister Lalduhoma’n hawng.
Dawrpui Multipurpose Hall-ah sorkar laipui tribal affairs ministry hnuaia Tribal Cooperative Marketing Development Federation of India (TRIFED) leh Mizoram sorkar cooperation department tangkawp buatsaih bazar hi chief minister hian Thawhtanni khan Dawrpui Multipurpose Hall, Aizawlah a hawng a ni.
Chief minister chuan, hmarchhak mipuite chuan lehkhabua an history-te ziaka an dah hma atang tawhin an puantahah, an thiamhnangdehah an chanchin an ziak kai tawh tih sawiin, “Vawiina he bazara kan thil pho, kan kutchhuakte kan en hian, kum za tam tak chhunga kan lo inhlanchhawn tawh themthiamna leh kan nunphungte kan hmu tel a ni,” a ti.
Khawvel changkanna avangin khawl hmangin hmanraw tam tak deh chhuak ni tawh mah se hnam thil leh an kutchhuakte erawh vawiin thlengin an deh chhuah dan a la ngai reng tih a sawi a. “Kan hnam zia (identity) kan tah tel zel a, kan chanchin puangtute an ni,” a ti a. A dek chhuak thiamte pawh hi an hlu tih a sawi.
An kutchhuakte chu duhpuitu an tam zel a, “A hralhna a tha tial tial dawn,” a ti.
State pawn atanga kalte chu mikhual taka awm lo turin a chah a. A theih phei chuan Aizawl fang a, chhungkaw thenkhatte tlawh kual turin a chah.
Khualzahawm, Rural Development & Administration MInister Prof. Lalnilawma pawhin cooperative movement chu ram danga mi tam takin an hlawhtlinpui tawh angin Mizoramah pawh hlawhtlinpui tumin ke an pen mek tih a sawi a. “Tun hnaia Lammuala Horti Fair kan buatsaihah pawh khan ni khatah Rs. nuai 20 lakh hu kan hralh ziah,” a ti.
PS Thuingaleng, IRS, Regional Manager, NE Region pawhin thu a sawi a. Mizorama an VDVK-te chu hmarchhak biala tha ber berte an nih thu leh an thilsiamte chuan a funna mawi zawk a mamawh thu tar langin, chutianga an kalpui theih chuan a hralhna lamah hma an sawn a rin thu a sawi.
Bazarah hian Tribal Food Cuisine Stall pahnih hmarchhak state hrang hrang atanga kalten stall 13 leh Mizoram atanga tel stall 12, an vaiin stall 25 an awm a. Textiles, mau atanga siam thil leh natural produce zawrhna a awm a ni.
Aadhi Bazar hawnna inkhawm hi Commissioner & Secretary to the Government of Mizoram, Cooperation Udit Prakash Rai, IAS-in a kaihruai a ni.