- Thangkhuma (T-a)
Kum 36 kal ta atang khan Argentine President-ten a hmunah an ramin World Cup football an khel lai an en ngai tawh lo.
- Eng vangin ?
1990 World Cup-ah khan champion lai an ni a, tournament hawnna inkhelah an inlan dawn. Inkhel tura khelmual an pan hmain locker room-ah President Carlos Menem chuan phur takin Argentina team a tlawh a, a hnua thil thlengin a barakhaih. Cameroon-in 1-0-in champion lai an lehthal a, Menem-a chet dan hi Argentine mipuiin anchhia (mufa) tiin an sawi zui a, an dem.
Heta tang hian Argentine President tute pawhin chhiatna thlentu nih an hlau a, an ram team tawiawm turin a hmunah World Cup inkhel an en ngai tawh lo. Tuna an President Javier Milei hi US President Donald Trump leh FIFA President Gianni Infantino nen inthian tha tak an nih avangin a hmunah World Cup final en ngei tura beisei a ni a, an ram superstar Lionel Messi-a hun hnuhnung ni tura ngaih a ni tel bawk a, chuti chungin a chenna hmun Olivos-ah inkhel a en dawn tih ningani khan a sawi daih tawh.
Milei hian puithuna thil a ngaih pawimawh viau a; quarterfinal-ah Argentina-in 3-1-in Switzerland an hneh a, he inkhelah hian goal an khung hmasak hnuah Swiss-in an si phurh an sut ve leh a ni. Milei chuan : “An inkhelh laiin khua a vawt hle a, in chhung tihlumna hmang lovin oil company jacket ka ha a. A hnuah a lum ta viau a, ka phelh ve leh Switzerland-in goal an thun. Ka ha leh a, phelh tawh lovin ka ha tluan,” a ti.
Argentine President hian final-a Spain nen an inkhelh hunah pawh oil company jacket ha chungin a hmaa an enna TV atangin a en leh dawn tih a sawi.
- Puithuna thil hi Argentine-ho chuan ‘cabalas’ an ti a, chu chuan an nunphung a kaihhruai nasa. Tun World Cup-ah vawi sarih khel tawhin an la chak vek a. Mi thenkhat chuan an ram team-in an khelh apiangin a tir atanga an kawr ngai char char an la ha a, an su fai a nih chuan tluanpui lo turah inngai telin thla khat chuang an su tawh lo a, a uar deuh phei chuan su lova kekawrte ngai char char ha pawh an awm niin an sawi.
- Thenkhat chuan inkhel an enna hmun an ngai pawimawh a, an tluanpui nia an hriat avangin a hmun ngaiah en chhunzawm zel an duh. Buenos Aires bul lawk Liniers khuaa cheng, football atchilhtu nia inchhal Andres Gonzalez chuan : “A hmaa inkhel kan enna hmun, kan awmna hmun ngai chiah kha tute pawhin luah leh vek kan duh,” tiin AFP a hrilh.
Kum 48 mi Gonzalez chuan : “Inthiarna hmuna kan awm laiin goal kan khung a nih chuan chhuahsan tawh lovin a tawp thlengin kan awm zui ngar ngar thin,” a ti a, cabala a ngai pawimawh tih sawiin vanneihna thlentu niin a hria.
- Tun World Cup-ah hian video darh zui ta a awm a, Round of 16-ah Egypt nen inkhelin si hnih fai an phur hmasa. Mi thenkhat intiam rualin Bible an chhiar ho a, heta tang hian Argentina-in goal thunin 3-2-in an hneh let a, hemi hnu hian an ram team-in an khelh apiangin Bible an chhiar ho zui ta ziah a ni.
- Sociologist Diego Murzi chuan AFP hmaah hetiang hian a sawi a; tunlai khawvel thlengin puithuna thil hi nuihzatthlakah an ngai lo va, mi eng emaw zatin nun dan phung pangngai angin an la kalpui reng a ni, a ti.
“Puithuna thil hi an nun peng khatah a bet tel a, vanneihna thlentu nia an ngaih rualin vanduaina nen pawh a inzawm niin an ngai,” a ti.
Murzi hian 1986 World Cup-a thil thleng kha sawi chhuakin khatih laia Argentina coach Carlos Bilardo kha Argentine mipui sukthlek tifiah tura entirna tha tak a nih thu a sawi.
Kum 40 kal ta khan Billardo chuann Diego Maradona-a telna Argentina national team enkawlin World Cup-ah a champion-pui a, science lamah hriatna nei thuk tak ni mah se puithuna thil ngai pawimawhin a kal na hle.
Argentina-in tournament tan nan South Korea an hmachhawn dawn a, inkhelh tan hma locker room-a an awm laiin telephone a rawn ri a, defender Jose Luis Brown chuan laiin engtin mah an rawn chhang zui lo. 3-1-in an chak a, Billardo chuan tournament chhung zawngin an inkhelh hmaa telephone a lo ri a nih chuan Brown hi a laktir ziah a ni.
Bilardo hian vanduaina thlentu nia a ngaih avangin tournament chhung zawngin ar sa ei a khap a, team bus-ah pawh thutna bik an nei vek bawk.
1986 World Cup-ah hian quarterfinal-ah 2-1-in England an hneh a, hemi tum hian away jersey a pawl tak an ha a, kawr pawl tak hi an tluanpui niin an hriat phah. Tun World Cup semifinal-ah England nen intawng lehin, an inkhelh hmain FIFA hnenah an jersey pangngai a var leh a paw dal, a dung zawnga tial aiin kawr pawl tak hak an dil phah a ni.