China chhimthlang lam, Chongqing khawpuia lei min nasa tak, mi pariat vel thihna leh mi 34 chin hriat lohva an awm meknaah chhanchhuah hna thawktute chuan Pathianni khan dam chhuakte zawngin an hai chhunzawm.
Zirtawpni zing khaw var hma khan khawpui dai, Pengshui County-a tlang awih chu minin lung leh lei tam tak a tla a, chenna in 10 chuang a chhilh.
Pathianni tuk khan chhanchhuah hna thawktu eng emaw zatin ip serthlum rawng nen hna an thawk zui a. Lak chhuah an nei em tih erawh finfiah a ni lo.
Sorkar broadcaster CCTV chuan in 21 chu lei min hlauhawmna huam china awm tiin a chengte sawn chhuah an ni tih a puang a. Thuneitute chuan tlang awih leh hmun hniam lai, chhiatna thlenna atanga km khat biala awm mi 1,100 chuang sawn chhuah hna an thawk tih Chongqing thuneitute chuan Pathianni khan WeChat-ah an tar lang.
Thuneitute chuan dam chhuak mi 10 zinga pakhatin damdawi in a chhuahsan a, pakuate dinhmun a tha tih an sawi a. Mi pariat thiin lak chhuah an ni tih an sawi.
Inrinni khan thawktute chuan uisathiam leh detector nen dam an la awm tih an hmu thei a, mi pakhat emaw lei hnuaiah a la dam niin an hria a. Hetih lai hian thawktute chuan la chhuak turin a dang chim belh a awm phah theih avangin ruahmanna uluk taka siam a ngai tih an sawi.
Lei min hi lung leh hnawl cubic meter 18,000 chuang niin lung pakhat phei chu cubic metre 3,000 vel a ni tih Pengshui County-a Planning & Natural Resources hotu, Wang Chuanjun chuan Zirtawpni khan a sawi.