Aizawl: MNF Political Advisory Committee (PAC) member leh Minister hlui R. Lalzirliana chuan Thawhtannia MNF Hnam Run chhung inkhawmah ZPM sorkar chu tlin lohna leh eiruknaa inhnamhnawihah puhin, an thutiamte an bawhchhia nia a hriat thu a sawi.
R. Lalzirliana chuan ZPM sorkar hnuaiah eirukna leh sorkar inrelbawlna dik lo a hluar hle tih sawiin, Lengpui Airport ram chungchangah CBI case hial a awm tak dante leh Tourism Department-a Director leh OSD post chungchanga dan kalha hmalakna awmte chu MNF chuan pawi an tih thu a sawi a. Officer-te thurawn ngaihsak lova mahni tanghma hai vanga hna pek leh hlawh lak tumna hian ram inrelbawlna a tichhia nia sawiin, ZPM party sorkar chu thutiamah an ding lo tih a sawi bawk.
Minister hlui hian MNF sorkar hmasain Aizawl khawpui leh Mizoram hmun hrang hrangah Secretariat thar, Bus Terminal thar leh kawngpui tha tak tak te a lo din pui tawh thu sawiin, “MNF sulhnu leh hmasawnna ruhrel din tawhah tun sorkar hi a lo par ve mai chauh a ni,” a ti.
MNF chhung inkhawm hi Dr. ZR Thiamsanga, Ex-MLA (General Secretary, GHQ)-in a kaihruai a ni.