Aizawl: Mizoram State Planning Board Vice Chairman Dr. Kenneth Chawngliana chuan New Delhi-ah Thawhlehni khan NITI Aayog Member Rajiv Gauba hmuin, Mizoram hmasawnna leh Viksit Bharat @2047 thleng tura thawhhona tihchak dan tur a sawipui.
An inkhawmnaah hian Dr. Kenneth Chawngliana chuan NITI Aayog-in State Support Mission kaltlanga State Institution for Transformation (SIT) leh Transformed Mizoram Vision 2047 buatsaihah an puih avangin lawmthu a sawi a. Mizoram chu Vision 2047 hnuaia hmalakna hnaa a luh tawh thu sawiin, flagship programme leh project hrang hrang atan State Support Mission 2.0 kaltlanga chak zawka thawhhona a ngaih pawimawh thu a sawi.
Mizoram-a rel a luh tak hnuah kum 2025-26 chhung khan tourist lo kal zat nuai 9.81 tling tawhin, tourism sector a thang zel tih sawiin Dr Kenneth Chawngliana chuan, hemi zulzui hian Aizawl-a Mizoram Tourism Conclave buatsaih pui turin NITI Aayog a sawm a. Hei bakah hian Mizoram Ginger Mission leh ‘Ginger Capital of India’ anga Mizoram hmasawnna sawiin, Rajiv Gauba leh NITI Aayog member-te chu Mizoram tlawh turin a sawm nghal.