Kumin NEET-UG exam zawhna put ru avanga Union Education Minister Dharmendra Pradhan bâng tura phuta Delhi khawpuia Jantar Mantar-a pungkhawmte thlawpna lantirin Nilaini chawhma dar 10 atang khan Vana Pa Hall tualah pawl huaihawttu bik awm lovin Mizo thalai leh zirlai intelkhawm buatsaihin an pungkhawm.
Punkhawm tannaah NEET exam kaihhnawih avanga nunna chân tawhte sunna hun tawi neih a ni a. Hemi hnu hian punkhawm kaihruaitute chuan he hmunah hian pawl bik buatsaiha pungkhawm an nih loh thu leh zirlai dikna chanvo humhim tura pungkhawm an nih zawk thu an sawi a. Chu bakah, he punkhawm hi an chochhuah ni lovin zirna lama system tha lo duangtute chochhuah zawk a nih thu an sawi bawk.
Punkhawmnaah hian kal khawmte chuan India-a exam kalpui danah rinawmna leh langtlang, mawhphurhna lakna leh dikna a awm ngei nan leh zirna kalphung siam that a nih nan an aw an chhuah a. He hunah hian thusawitu hrang hrangte chuan zirlai harsatna tawktute an thlawp tlat tur thu leh Gen Z-te chu chhawrtlak loh an nih loh thu sawiin, chhawr an nih loh thu an au chhuahpui bawk.
Pawl huaihawttu bik awm lova Mizo thalai leh zirlai punkhawm hi tlai dar 3 velah an tin darh a. Tharum thawh lova felfai leh muanawm takin punkhawm hi huaihawt a ni.
Tun hnaia NEET exam zawhna paper put ru avangin mi 20-in nunna an chân tawh a, tun tum hi a vawi khatna a ni lo va, kum thum chhung a zawnin a put ru a, mi tam takin an nunna an lak phah tawh a ni.
NSUI, MNF leh ZPM ten thlawp
Ram chhung hmun hrang hrang leh Mizorama NEET exam paper put ru avanga zirlaiten lungawi lohna an lantir mek chu National Students’ Union of India (NSUI) Mizoram bakah Mizo National Front (MNF) leh Zoram People’s Movement (ZPM) chuan an thlawp tlat thu thuchhuah siamin an tar lang.
NSUI Mizoram chuan zirlai dikna chanvo humhim tura thil phut hrang hrang — Union Education Minister Pradhan-a bânna, paper put ru avanga tuartu zirlaite hnena zangnadawmna Rs vbc 1 pek leh India zirna siam thatna te chu an thlawp tlat tih an sawi.
Delhi Police-ten lungawi lohna lantirtu zirlai pawisawi lote chunga an chetna leh a phena thuneitu Central BJP sorkar an dem tak zet tih sawiin, central sorkarin zirna tha pek aia sakhaw atchilhna hmun tura siam a tum nia tar langin, hnam leh sakhaw piah aia zirna dik tak tundinna tura zirlaite huaisen taka an pen chhuahna chu chhuanawm an tih thu an tar lang bawk.
Nilainia Mizoram thalai leh zirlaiten an dikna chanvo humhim nana huaisen taka hma an lakna leh an pen chhuahna chu MNF pawhin lawmawm an tih thu leh an thlawp thu an tar lang ve bawk.
MNF chuan ‘zirlaiten thuneihna hmanga rah beh an duh lohna te leh hemi avanga tuartute thlavang an hauhsak hi an tih tur dik tak a ni’ tiin, thu dik tun dinna tura pen zel turin zirlaite an chah nghal a ni.
“He punkhawmna hian kan hma lama Zoram tiêng se, India pawh hian Mizoram thalaite chuan sual an hua a, nawmsipbawlna hmanga kan ram suasam hi kan remti ve lo a ni tih hi lo hre mawlh rawh se. Sual doa dikna hmanga hnam tun dinna kawnga hmalatute reng reng chu MNF chuan kan thlawp zel dawn a ni,” an ti.
ZPM Media & Publicity Department chairman, Minister B. Lalchhanzova pawhin thuchhuah siamin India hmun hrang hrang leh Mizoram ngeia zirlai tam takin NEET zawhna paper put ru avanga harsatna leh manganna an tawk chu pawi an tih thu a sawi a. Professional course zawk zir tura beitu zirlaite rilru thianghlim leh dikna chanvo atana buaina siam lova an pen chhuahna chu ZPM chuan a takin a tawrhpui a, a thlawp tlat a ni tiin a tar lang.
B. Lalchhanzova chuan he buaina avanga zirlaite leh an nu leh pate hun, pawisa leh rilru thleng a nghawng chhe tak avanga an tawrhna chu khawvel hriatah an hriatpui thu sawiin, ZPM sorkar pawhin sorkar hna lakna kawngah dik tak leh fiah fai taka hma a lak chhoh zel thu a tar lang bawk.