Democratic Republic of the Congo (DRC)-ah Ebola leng mek avangin mi 1,000 dawn an thi tawh tih an ram health ministry-in a sawi.
DRC-a National Institute of Public Health chuan May thla atanga Bundibugyo chi bik leng avang hian Nilaini thleng khan mi 999 an thi tawh tih a sawi.
World Health Organization (WHO) chuan an thenawm, Uganda-ah mi pahnih an thi tawh bawk niin a sawi.
DRC-a health ministry chuan Thawhtanni khan hri kai mi 2,473 an chhinchhiah tawh tih an sawi a. Mi 737 vel dah hran leh damdawi ina awm mek an awm tih an sawi.
DRC-ah hian hmarchhaka Ituri province-ah thi an awm nual hnuah May 15 khan hri a leng tih puan a ni a, he hmun hi hri a darhna hmun ber a la ni reng a. DRC-a leng kaihhnawihah hian Uganda-ah pawh a darh zui nia ngaih a ni.
Mi 28,000 vel kai leh thihpui mi 11,000 chuang an awm tum, thihpui an tam ber tum, thla riat chhunga mi 1,000 an thih tlin tum, kum 2013-16 inkara a len tum telin tun tuma hri leng hi Ebola leng tawhah thi an pun chak ber tum a ni tawh.
Thla hmasa khan WHO chief Tedros Adhanom Ghebreyesus-a chuan tuna leng mek hian thla khat chhungin ‘a hma zawng zawng aiin a tuam zau chak’ tih a lo sawi tawh.
Ebola hi a kaiin mi dang a tawh te, a taksaa tuiril chhuakin mi dang a kai atanga inkaichhawn theih niin Ituri bakah province dangah a kai an awm nual tawh.
WHO hnuaia Bundibugyo strain incident manager Thierno Balde-a chuan Thawhlehni khan hri leng beihna tichak zel mah se ‘hri leng hi kan la umphak lo hle a, nanchin tumin kan la bei mek zel a ni’ tih thuthar lakhawmtute hnenah a sawi.
Bundibugyo chi hi a invenna emaw, a enkawlna damdawi emaw pawm a la awm lo.
Thawhlehni vek khan Africa-a Centres for Disease Control & Prevention (Africa CDC) hotu chuan hri leng a darh chak dan chu ngaihven a ngai tak zet tih a sawi.
“Kan chet a ngai. Vawiina kan titawp lo a nih chuan hriat theih china a nasat ber kan hmabak a ni,” tiin Africa CDC Director-General Jean Kaseya chuan X-ah a tar lang.