India-a Cockroach Janta Party (CJP) chuan Education Minister Dharmendra Pradhan-a a bân hnuah Inrinni zan khan chawlhkar nga zet lungawi loh an lantirna an titawp ta.
CJP hian mipui rorelnain hnehna a chang tih an sawi a, Delhi-a an awmkhawmna hmun, Jantar Mantar pung khawm sang telin lawmin an sahawk zui.
Online-a movement indin, AI hmanga siam chukchu lem an chhinchhiahna (mascot)-a hmangtu, CJP hi party tak tak ni lo mah se thalaite duh leh mamawh aupuina lian tak an ni.
Tun tuma nawrhna an huaihawt hi Prime Minister Narendra Modi-a sorkarin tun hnaia an laka lungawi lohna an hmachhawn lian ber a tling a, Thawhtanni kal taa parliament-a kawng an zawh lai police-in an nawr letna khan a tilian zual hle bawk.
Pradhan-a hian Inrinni chawhnu her hret khan a bân thu X-ah puangin Hindi-in ‘thalaite duh dan, hmathlir leh beiseina a zah tak zet’ tih a tar lang a, tun hnaia thil thlengte chuan a ‘tina tak zet’ tih a sawi bawk.
“Jantar Mantar leh ram chhung hmun hrang hranga thil thlengte hi ram dotuten remchanga an hman loh nan te, ram inpumkhatna vawn nan te, Indian zirlai tumahin dan an thlir dan a dik loh phah loh nan te, kan faten zirna leh an hma lam hun chauh an ngaihtuah theih nan te ka bânna chu prime minister hnenah ka thlen a ni,” tiin a tar lang.
Pradhan-a a bân hnu, Inrinni zan vek khan BJP hruaitu, minister ni lai mek zinga mi, Pralhad Joshi chu a aiawha a hna chelh tura ruat zui a ni a. Ani hian Pathianni tuk atang khan a chanvo thar hi zawmin ministry-a mi pawimawhte nena thutkhawm pawimawh pawh a kaihruai nghal a ni.
A bâng tih an hriat an hriat rualin CJP dintu, Abhijeet Dipke-a chuan Jantar Mantar-ah au chhuakin, “Kan hlen chhuak ta,” a ti.
Lawmna thawm ring taka chhawn nghal niin an zai a, an lâm a, an au va, chithlum an sem bawk.
A hnu darkar eng emaw zatah CJP chuan an lungawi loh lantir an titawp tih an puang zui a, zan thlenga la awm zui erawh an awm.
An awm khawmna hmun hi mahnia inpeten an buaipui a ni a. Police thahnem tak dah an ni bawk a; mahse, dan bawhchhiaa an awm loh chuan engtin mah an tibuai ngai lo tih an sawi.
CJP hi chief justice of India-in thalai hna nei lo, chanchinbu leh thil nawrna lama kalte sawi nana ‘chukchu’ tih a hman atanga inphuah an ni a. A hnuah a mi sawite hi ‘degree lem leh phuahchawp nei’ a sawina niin thalaite a sawina a ni lo tih a sawi leh.
Kum 30 mi, political communications strategist, Boston University-a lo zir tawh, Dipke-a’n online-ah party hi din zuiin thalaiten an bawh hle a, Instagram-ah phei chuan zuitu maktaduai 26 an nei tawh.
An duh ber chu India-a zirna kalphung siam that, exam zawhna put fo titawp tura hma lak leh Pradhan-a bân a ni.
June 28 atang khan activist leh educationist Sonam Wangchuk-a chuan thlawpna lantir nan chaw a nghei a, heta tang hian khawvelin a ngaihven zual.
A hriselna hniam zelah Wangchuk-a hi July 18 khan police-in tihluihnain damdawi inah an dah a, chaw a nghei zel tho va. Zirtawpni khan sorkarin a duhte tihhlawhtlinsak an tiam avangin a titawp.
CJP hi eptu political party lian, activist leh mi lar thahnem takin an thlawp tih an lantir a. A hmuna pung khawmte hian Modi-a beihna poster kengin an au rual nasa hle thin.
Inrinnia Pradhan-a a bâng ta hi eptu hruaitute pawhin lawmawm an tih thu sawiin thalaite hruai movement-in hnehna a chang tih an sawi.
Education minister bân phutna piah lamah hian he thil hi prime minister larna leh mi a hneh theihna tihniamtu anga ngaih a ni.
Kum 2014-a thuneihna an chan atangin Modi-a sorkar hian hetiang taka anmahni dona hi an tawng mang lo va. Kum 2021 erawh kha chuan lo neituten kum khat chuang an do hnuah agriculture law pathum an lo hnuk kir tawh bawk.