Aizawl: Fisheries Department hnuaia Central Scheme — Pradhan Mantri Matsya Sampada Yojana (PMMSY) tanpuina ‘Promotion of Recreational Fisheries’ dawngtu, Joint YMA Sialsuk-ten Khualbuk, Lawngleng chuanna leh Nghakuai chiahna tura hmun an siam chu Fisheries Minister Lalthansanga’n Zirtawpni chawhnu khan a hawng.
He hun hi Aizawl South-III Bialtu MLA Baryl Vanneihsangi chuan Khualzahawm niin a hmanpui.
Hawnna inkhawmah hian Fisheries Deptt Deputy Director Lucy Lalrinpuii chuan PMMSY tanpuina dawn dan leh Sialsuk Joint YMA-te hnathawh chungchanga hriat tur pawimawhte a sawi a. Khualbuk hawnna hman zawh hnu hian mipuite nen a lawmna ruai an theh zui a ni.
He hunah hian Aizawl DFDO C. Lallianpuii leh Fisheries Department thawktu engemaw zat, Sialsuk khaw chhunga sorkar department hrang hrang, NGO-te leh Sialsuk leh a chhehvel mipui thahnem tak an tel a ni.