Aizawl: India rama NEET zawhna put ru avanga thalai tam takten tuarna leh nunna chân phah hial an awm chu pawi a tih tak zet thu BJP Mizoram President Dr K Beichhua, MLA chuan a sawi.
Thawhtanniaa BJP Mizoram State Office, Mipui Run, Upper Republic-ah karthar inhlanna leh Political session hun an hmanah thu sawiin Dr K Beichhua chuan, NEET Exam zawhna put rua mawhphurtu thenkhat te chu man chhuah an nih tawh bakah, inhnamhnawih dang an awm leh awm loh pawh chhui zui zel a nih theih nan Prime Minister chuan Fast Track Court a din nghal a ni. Hemi bakah hian exam buaipui tuten mawhphurhna an lak fimkhur lehzual nan hremna dan khauh tak siam a nih thu a sawi.
Dr K Beichhua chuan Union Education Minister Dharmendra Pradhan-a’n ama tihsual ni miah loah mawhphurhna ngaihsaka huaisen taka banna a theh lut chu a fakawm tak zet a, hei hian BJP sorkar thupui ‘Good Governance’ (Rorelna |ha) kalpui duhtu a nihzia a ti lang chiang hle tiin a sawi. Hemi piah lamah thalaiten hmalam hun eng an neih zawk nan Prime Minister Narendra Modi-a ruahmannana High-Powered Task Force on Examination Reforms, Nandan Nilekani kaihhruaina hnuaia din a ni chu exam langtlang leh felfai tak a awm theihna tur atan thil lawmawm tak a nih thu a sawi bawk.
Mizoram politics chungchang sawi chhunzawmin, Dr K Beichhua chuan Mizorama thalai lehkha thiam leh zir mek ten politics-a rilru an seng nasa hle mai chu thla a ti muang hle a, ram hmakhua a eng tih a ti lang chiang hle a ni. Chuvangin Mizoram thalai duhawm tak te chu mi thusawi mai mai a innghat lova thudik zir chiang hmasa zel tur leh, thalai te leh kuthnathawktu ten beisei ram an thlen theih ngeina turin politics hrisel ngaihtuah a rilru seng zel turin a chah nghal bawk.