Adviser to Chief Minister (Finance & Planning) TBC Lalvenchhunga, MLA chuan thalaite chu zirlaite chu mahni kea ding thei ni tura inbuatsaih uar zel turin a fuih.
Thawhlehnia Vana pa Hall-a Govt. Aizawl West College (GAWC) Freshers’ Social 2026 a hmanpuinaah khuallian TBC Lalvenchhunga chuan, zirna tha chu ‘All-round development’ a ni tih sawiin, thangtharte kawng tinrenga hmasawn ngai tak dinhmunah an din tawh thu a sawi a. Sorkar hna hian a daih seng tawh loh avangin inelna sang tak karah entrepreneurship leh sumdawnna emaw thilsiamna hmanga mahni kea ding thei ni tura inbuatsaih uar a tul thu sawiin zirlaite a fuih.
TBC Lalvenchhunga chuan, “Artificial Intelligence (AI) lamah khawvel a thang chak hle a, AI hi hman thiam a pawimawh rualin, keimahni theihna tihpun tum lo va, AI rinchhan ringawta thil kan zir a hlauhawm thung a, keimahnia awm kan theihnate tichak tura lehkha kan zir a tul a ni,” a ti.
Khuallian hian Aizawl West College campus thar sakna turin SASCI atangin Rs vbc 30.40 dah a nih thu leh hna kalpui mek a nih thu a sawi bawk.
He hunah khuallian hian H. Vanlalkeuva Award leh Best Library User Award 2025-26 dawngtute hnenah lawmman a hlan a, College Annual Magazine 33-na a tlangzarh nghal bawk.