Mizoram Pradesh Congress Committee (MPCC) chuan central sorkarin parliament monsoon session-a National Song ‘Vande Mataram’ humhimna tur bill chungchangah Mizo mipuite leh sorkarin ngaihtuahna an sen nasat a ngai hle niin an sawi.
Aizawl Press Club-a Thawhlehnia thu thar thehdarhtute an kawmnaah MPCC hruaitute chuan Vande Mataram hla hi tun hma pawha lo sak thin tawh a nih thu leh Mahatma Gandhi leh Congress hotute khan Hindu Pathiannute chawimawina chang chu sak tawh loh nise an lo tih tawh char char a nih thu an sawi.
Tunah erawh National Anthem sak hma hian he hla hi an pathiannute chawimawina nen sak tur a rawn ti ta a, he hla sak lai hian a thei zawng zawngte din vek tura thupek leh thupek awih lo te hremna siam a ni dawn a. Sorkar official function hrang hrangah he hla hi an saktir fo tawh thu sawiin, Naga unaute chuan he hla sak chu sawi loh, an din duh loh thu an sawi bawk.
Congress hruaitute chuan, “Keini development duh huam huamte hian kan rinnain a pawmpui loh, an pathiannu Durga leh Laksmi te chawimawina sakpuiin kan ding dawn nge, development leh therhlo min tiamte awh vang leh Peace City te min tiam vangin kan sakpui dial dial mai dawn? Mahni theuh i inzawt ang u,” an ti.
FCRA Amendment Bill duh lohna lantirna atana Black Day/Protest Day an lo hman tawh avanga Mizo mipui, kohhran leh sorkar te an thangharh ta deuh nia an hriat avangin lawmthu an sawi a. Sorkar laka an thil phut pui pathum — special assembly session koh, Delhi delegation din leh MP-ten parliament-a an dodal ngei tur a nihnate chu an la dinpui reng thu sawiin, Mizoram sorkar leh chief minister chu kohhran hotute hmatheh mai lova hma hruai ngam turin an ngen nawn leh a ni.