Conor McGregor chu tun thla tirah UFC-ah kir leh mah se a ke ding lam hliam vangin tum angin a awm thei ta lo va. A khup ruh a tihchhiat thu sawiin kum 2027 nipui hunah chuan a insual leh theih ngei a inrin thu a sawi.
July 11-a welterweight bout-a Max Holloway a hmachhawn tan tirh, second tlem te chauh a kal hman tihin McGregor hi a inhliam a. Social media-a a tar lan danin a hliam hi kum 2013-a Holloway nena an intum tuma a hliam tawh nen khan a tehkhin a ni.
“Ka inhliam dan hi ka khup ruh a ni a. Holloway nena kan insual hmasak bera ka hliam ang chiah kha a ni a, tun tumah erawh a lehlam a ni thung a, a mak hle a ni,” a ti.
UFC president Dana White chuan he hliam chungchang a sawi hnuah McGregor hian a sawi ve a. Chanchin kimchang an zawhnaah a khup chu a hliam chiang hle tih a sawi.
Kum 38 mi, McGregor chuan tiang hawl loin a kal theih tawh thu leh ke sawizawina a neih theih thu a ziak a. Kum 2027-a insual leh theih a inrin thu a sawi a, hei hi a UFC contract neih laia a insual hnuhnung ber tur a ni ang.
“Khami tum khan thla kaw chhungin Diego Brandao hmachhawn turin ka kir leh a. Tunlai damdawi lam thiamna sang zel leh inbuatsaihna tha zawk nen hian nakkum nipuia kir leh theih chu ka beisei hle,” tiin a sawi.
White chuan McGregor-a insual leh tur chungchang sawi zui chu a thlawp rih lo hle a, “McGregor-a thil sawi chungchang hi chu hun khawhralna mai a ni a. Khup zai a ngai dawn a, physical therapy a lak a ngai ang, heng zawng zawng hian hun a duh rei dawn a. Doctor-in inbuatsaihna khauh zawk i tan thei tawh ang a tih hunah chauh a chungchang hi chu kan sawi tha leh ang,” a ti.
Holloway laka a tlawm hi July, 2021 hnua McGregor-a UFC fight hmasa ber a ni a, khami tum khan Dustin Poirier lakah first round-ah a ke vei lam a tliak a nih kha. “Kan hma lam hun panin kan kal zel ang, lungngaihna tur a awm lo. Mipuite thlawpna leh duhsakna zawng zawngah ka lawm e, hriselna hi hausakna a ni,” tiin a sawi.