Chief Minister Lalduhoma chuan AIR Aizawl chu mipuite thian rintlak, thuthar puangtu rinawm leh sorkar leh mipui inkar thlunzawmtu pawimawh tak a nih thu a sawi.
AIR Aizawl kum 60 tlinna (Diamond Jubilee) puala thuchah a tichhuahah Chief Minister chuan, AIR Aizawl-in kum 60 chhung zet rinawm leh thahnemngai takin mipuite rawng a lo bawl tawh tih a sawi a. AIR Aizawl hian chhum lo chat lovin thuthar, rimawi leh hriatzauna tam tak, program hrang hrangte mipuite hnena a lo hlan chhuah thin avangin thawktute zawng zawng hmalakna leh inpekna chu chhuanawm a tih thu a sawi.
Chief Minister chuan kum 60 liam ta chhung khan harsatna leh chona hrang hrang awm mah se, AIR Aizawl chu nghet takin a ding zel a, buaina lian tham awm miah lova kum 60 chhung an rawngbawlna a kal tluang zel chu lawmawm a tih thu a sawi.
Mizoram sorkar leh AIR Aizawl ten thawhhona thui tak an lo neih tawh thu sawiin, kum 60 chhung rawng an lo bawl tawhna leh hlawhtlinna an lo neih tawhte chu fakawm a ti a. Hmalam hun zela hmasawnna duhawm zawk an neih zel nan duhsakna sang ber a hlan nghal bawk.