Aizawl: Sorkara an thil phutte tihhlawhtlin a nih theih nana Sit-in Demonstration-te lo nei tawh, Mizoram Govt. Adhoc-Aided High School Teachers’ Association (MIGAHTA) chuan sorkar aiawhte nen boruak tha tak hnuaia an inbiak hnuin an nawrhna chu Ningani chhun dar 12 atang khan an titawp lailawk.
An nawrhna titawp tura hmalakna hi MZP palaina hnuaiah neih a ni a. Ningani khan Adviser to CM (Political) leh ZPM vice president ni bawk, Lalmuanpuia Punte pisa-ah an inbia a. He hunah hian MIGAHTA hruaitute chuan an lungawi lohna leh thil phutte hmaichhanah sawiin sorkar pawhin an hmakhua leh hmalak zel dan tur ruahmanna an lo sawipui a ni.
Hlawhtling taka an inbiak tak avangin Thawhtanni atang hian zirtirtute chu mahni school theuhah hnathawk chhunzawm leh turin hruaituten an hriattir nghal bawk.
Sorkar aiawh nena an inbiak hnu hian MIGAHTA chuan resolution an siam nghal a. Inbiaknaa an thil phut sorkarin awm an tihpui ang ngeiin August 12, 2026-a ZPM PAC Meeting hmasa bera sawiho a, chu thutlukna chu concerned department-a thlen tura an tiam anga hmalakna chu ngaihchan a nih tur thu te, ‘The Mizoram Education (Lumpsum Grants-in-Aid for General Maintenance of Private School) Rules, 2026’ tihchhuah tharah adhoc high school, provincialised ve lote Special category I-a dahna notification tichhuak lo tura tiam an nih angin, sorkarin notification a tihchhuah loh an beisei thu te, an inbiakna palzuta notification hi chhuah a nih chuan a chhuah tuk atang ngeia nasa zawka lungawi lohna lantir zui nghal an tum thu leh an dinhmun aia hniama sorkarin dah a tumna rules thar hi an pawm thei ngai dawn lo va, thuneitute pawh notification tichhuak lo turin an ngen nawn tih leh an thil phutte hriatthiampuia a taka tihhlawhtlinsak turin sorkar an ngen a, sorkar hmalak zel dan tur hi an thlir reng dawn tihte a tel a ni.