Aizawl: Adhoc Aided Middle School zirtirtuten Mizoram Education Rules 2025 duh lovin nawrh an tum.
Mizoram Government Adhoc Aided Middle School Teachers’ Association chuan, Mizoram sorkarin Mizoram Education (Provisional Adhoc Grant-in-Aid for General Maintenance of Private School) Rules, 2025 tichhuaka Deficit, Adhoc, leh Provisional Adhoc Grants-in-Aid School-te a huamtirna chu zirlaite, sikul, leh zirtirtute tan thil pawi tak a tling hle tiin an duh lohna an thlen.
He dan hian RTE Act 2009 duh dan palzutin naupangte sikul kalna a tihhlat theih bakah, sorkar hmasain October, 2023-a dinhmun tha zawka a lo dah tawhna thiahsak an ni chu an duh lo takzet a, sorkar sikul zirtirtu leh zirlaiten hamthatna hrang hrang an dawn angte pawh dawng ve thei ngai lo tura barhluhna dan a nih avangin an pawm theih loh thu an sawi.
Sorkar hmasain a lo dah tawhna (provincialised) humhim tur leh sikul, zirlai leh khawtlangin hamthatna an dawn tawh, an hloh leh tak hmu let leh ngei turin August 3 atanga August 7, 2026 inkarah an member zawng zawngten badge dum an bel dawn a, chumi hnu August 10 atanga August 12, 2026 inkarah badge dum bel chungin ‘Pen down Strike’ leh ‘No Teaching Day’ hman zui an tum bawk.
Heng an hmalaknate hian thuneitute a tihharh zawh loh erawh chuan August 18, 2026 hian Aizawlah kalkhawmin, hmalak zui dan tur an ngaihtuah leh dawn a ni.
Association chuan he an lungawi lohna lantir avanga zirna kawngah bahlahna a thlen a nih pawhin mipui hriatthiamna an ngen bakah, an dinhmun humhimsak tur leh hamthatna an hlohte hmu let leh ngei turin sorkar hotute khawngaihna leh hriatthiamna sang ber an ngen a, Zoram mipui zawng zawngte thlawpna leh tawiawmna an ngen nghal bawk.