ZPM Adviser B Lalchhanzova chuan, “ZPM hi mi thenkhatten an party chhung an buai an ti thin, buai tak chunga din a ni a; mahse, a buai lo zawng hlirin kan la kal thung,” a ti.
He thu hi Thawhtannia ZPM General Headquarters-in an party pisa-a chhung inkhawm an hmanah B Lalchhanzova hian a sawi a. ZPM chu mipui leh ram veitute tawngtai chhuah a nih thu sawiin, party member-te Pathian rawn tam turin a ngen a, sorkar fawng an chelh chhungin tihdik loh te pawh awm bawk mah se, ram tan hmabak tam tak an la neih avangin tha thlah lova hmang zui zel tur an nih thu a sawi.
B. Lalchhanzova chuan April, 2024 atanga March, 2026 (thla 21) chhung khan buhfai sem bang thla leh atana sem tura dah that an tih, ‘Carry Over’ kaltlangin buhfai quintal 105,973.19 (Rs. vbc 38 man lai) humhim a nih thu leh sorkar inthlak tak atanga retailer bân an awm miah lova dan angin an term an hmang zo zel tih a sawi a. Mizoramah ration card sen leh var hmang mi 4,42,216 (37.7%) leh NFSA (pawl leh eng) hmang mi 7,08,191 (62.3%) an awm mek thu a sawi bawk.
Land Revenue & Settlement Department bikah, apartment floor/chhawng lei theihna (The Mizoram Land Revenue Act, 2013) hnuaia bank loan lakna kawnga harsatna awm thin sukiang turin notification tihchhuah a nih tawh thu leh land lease sub-lease duhte tan DC-ah dilna thehluh theih tura thuneihna pek an nih thu a sawi a. E-Ram leh survey firm-te hman a nih hnuah file awmna hriat zung zung a nih bakah 24×7 Whatsapp Bot (84158 06438) hmangin mipuite tana awlsam taka thu thlenna hawn a nih thu a sawi.
Sorkar tharah hna lak dan a rintlak chhoh zel thu te, jail enkawlna dan hlui thlakin insiam thatna hmun, ‘Correctional Home’ anga kalpui dan thar, ‘The Mizoram Prisons & Correctional Services Act, 2024’ hman a nih tak thu te leh MIFCO kaltlanga kuthnathawktute sawhthing tharchhuah hralhsak kawnga ZPM sorkar hmalakna hlawhtling tak te chu minister hian a sawi fiah bawk.