Chief Minister Lalduhoma’n Inner Line Permit (ILP) leh Mizoram remna leh muanna chungchangah Mizoram Pradesh Youth Congress Committee (MPYCC) chuan Vana Pa Hall kawtah a thusawite duh lohna lantir nan an pungkhawm a, a thlalakah chief minister hi ‘pawnfen’ an fentir!
MPYCC President Ngurdingpuia Pachuau kaihhruaia hun hmanah hian MPCC General Secretary Rosiamngheta chuan thusawiin Chief Minister Lalduhoma chu hruaitu dinna nghet nei lo, tum mumal nei lo leh hlauh ngah lutuk a ni tiin a puh.
Rosiamngheta chuan Lalduhoma’n hmana ‘Vai kan hnawt chhuak dawn’ tia a lo intihthei thin te, USA a kal tuma Arakan Army-te an chak zawk avanga ngam loh thu a lo sawite leh tuna an inhung bikna, ILP hnam dang tana zuamawm thei tura a sawi chhuah takte chu ram leh hnam tana hlauhawm tak a ni tih sawiin, “Pu Lal Thanhawla leh a thawhpuiten Mizoram tana thutthleng an ken avanga remna leh muanna nei thei chauh kan nih laiin, hetianga sawi bawrhban hi a chi loh,” a ti.
Congress Thalai chuan chief minister hian a thusawite avanga Mizoram mipui rilru a hliam takzet nia sawiin tun chawlhkar chhung ngei hian mipui hnenah ngaihdam dil turin an phut zui a ni.