Democratic Republic of Congo (DRC)-a Ebola leng mek darh chak tak chu thihpui 1,700 chuang an ni ta a, hetih lai hian World Health Organization (WHO) chuan a enkawlna enchhinna a kalpui mek zel a, a invenna damdawi siam chhuah tuma beihna pawh beisei phak baka chakin kalpui a ni.
Ebola-ah pawh a chi tam lo tak, Bundibugyo strain an tihin a thlen hri avang hian May 15-a a leng tih puan atangin thi zat hi 1,707 an tling tawh a, a kai 3,802 chhinchhiah a ni tawh tih sorkarin a tar lang a. Hri kaite nena inhnimhnai mi 17,000 chuang thlithlai mek a ni tih WHO chhinchhiahnaah tar lan a ni bawk.
Tun tum hi Ebola leng tawha a nasa ber dawt leh darh chak ber a ni a. Tun hma lama leng ngai lo chi a ni a, a invenna emaw, a enkawlna damdawi emaw la awm lo a ni.
Thawhlehnia Geneva-a thuthar lakhawmtute a kawmnaah WHO-a R&D Blueprint programme chief, Vasee Moorthy chuan zir chiangtute chu a enkawlna enchhinna chu a hma zawng aia chaka kalpui a ni tih a sawi.
“A hmaa lo leng tawh thinte nena khaikhinin rang zawka enchhinna kalpui hi a ngai a ni,” a ti a. “Kan thlen china hmuhte pawh a lawmawm lam a ni,” a ti.
WHO Director-General Tedros Adhanom Ghebreyesus-a chuan Thawhlehni khan Congolese khawpui, Kinshasa thlengin kar tawp lamah hian hri leng tamna bul, Bunia a tlawh ang.
Africa Centres for Disease Control & Prevention Director-General Jean Kaseya pawhin Thawhlehni khan a vawi hnih nan Bunia tlawhin hri leng chuan engtikah nge a vanglai a thlen dawn tih sawi theih a la ni lo tih a sawi.
Hri leng hi khawchhak lama Ituri province-ah a nasa zual a, a kai hriat 90% dawn an awm a. Khawpui lian, Kisangani telin province pangaah a darh tawh thung.
WHO chuan damdawi ina thawk 100 chuangin an kai tawh niin a sawi a. Damdawi in thuneitute chuan hnu chhui, helho tharum thawhna, damdawi in beih leh a lenna hmuna mite nena inpawh theih lohna te chuan hmalakna a tisawt lo niin an sawi a. Puihna dawn tlemin nghawng a nei bawk tih a sawi.
Tun tuma Ebola leng hi a hmaa leng tawhte aiin a darh chak a. Kum 2014-2016 inkara Africa khawthlang lama lengah khan mi 28,000 chuangin kaiin mi 11,000 velin an thihpui a, a kai zat 1,000 tlin nan thla riat lai mamawh a ni thung.