- F. Vanlalrochana
PL Liandinga leh Vanneihtluanga te chu Mizo Literary Award hlan an lo ni ta a. Anni Pahnih hi chu a mala pek bik inthlahrunawm khawpa phu an nih avangin an pahnih hian dawng tura thlan an ni ti ila a dik mai awm e. He award hi Mizo Writers Association-in kum thum dana a pek thin a ni. Kum 1987 atang khan kum 3 danah Thu leh Hla kutpui an hmang thin a. Chung hunah chuan Thu leh Hla lama mi ropuite an chawimawi thin a. Chu an chawimawina hlan chu Mizo Literary Award an ti a ni.
Tute nge an nih a, Mizo Thu leh Hla mualah hian eng nge an lo tih tawh tihte han sawi dawn ila.
- PL LIANDINGA
July 24, 1955 khan Lungrang khuaah a lo piang a. Pachhunga University College –ah PU zir chhungin typist hna a thawk a, Evening Class-ah BA a zir. A zawh hnuin Delhi Unviversity atangin Social work-ah Master degree a zo leh a ni. Kum 1987 khan Lianzuali nen an innei a, tunah hian Khatla South, Aizawlah an chhungkuain, a tu leh fate an cheng mek.
PUC- ah typist te thawkin, All India Radio-ah kum 2 chhung Script Writer a ni bawk. Kum 1982 atang khan Social Welfare Department-ah Child Development Project Officer (CDPO) hna thawk tan a. Kum 2015 khan State Programme Officer nihna chelh chungin a pension.
Vantlang tan a hun tam tak a hmang a, a langsar ber chu Central YMA General Secretary kum 8 leh Vice President kum 2 chhung a nih kha a ni awm e. Kum 2020-ah Khatla South Local Council member-ah thlan a ni a, kum 2025-ah Local Council Chairman nihna a chelh.
- VANNEIHTLUANGA CHANCHIN
October 12, 1957 khan, Aizawl Civil Hospital-ah a lo piang a. Pachhunga College-ah chhun lam hna thawh pahin Evening Class-ah BA a zir a, 1978-ah a Graduate. Hrangbana College-ah Commerce kum 1 a zir leh zawk bawk.
October 12, 1982 khan Lalawmpuii nen an innei a, Chanmari, Aizawlah an cheng mek.
Assam State Electricity Board-ah Clerk a thawk zawk a. 1980-1984 chhung SBI Aizawl Main Branch-ah Bank Clerk a ni. 1984-ah AIR Shillong-ah Programme Executive hna a thawk a, 1985-1994 chhung AIR Aizawl-ah a thawk leh. AIR a chhuahsan hnuin Desktop Publishing a thawk a, Mizorama Computer zirna hmasaber pawl First Computers Class a din. LV Art firm dintu leh Offset khawl nei hmasa a ni. Kum 2001 atangin Lengzem Chanchinbu a tichhuak a, Kum 2004-ah Zonet Cable TV dintu pui pakhat a ni. Kohhran leh khawtlangah hotu a ni thin a, pawl dang dangah pawh hotu a ni a, a ram pum huapa thusawi tura sawm hlawh ber pawl a ni.
- THU LEH HLA LAMA AN SULHNU
Thu leh Hla lamah sulhnu chhuanawm tak tak an nei a. An pahnih hian heti hian han sawi kawp ta zel mai ila, hmun a heh lo zawk awm e.
Essayist tha an ni ve ve: Mizo zinga Essayist tha, thu ziak ngaihnawm thiam leh ngainat hlawh thlan dawn chuan Anni pahnih hi kan lam chhuah hmasak ber te zingah an tel ngei ngei tur a ni ang. An danglamna leh an hlutna chu, generation tinin ngaihnawm an tih leh an tawmpui theih tura an ziak thiam zel hi a ni a. College an kal lai atangin Literature tha an tuipui a, thu an ziak a. chu chu 1974 chho vel a ni tawh. Kum 40 chuang kal ta atang khan an la lar reng a, thuziak mi te zinbfa ngaih hlut hlawh ber pawl an la ni reng mai leh kutchhuak chhuanawm tak tak an la nei reng thei mai hi an danglam tak pawh a ni awm e.
Miin chanchinbu (periodicals) an chhiar hun laia chanchinbu langsar deuh, Meichher, Thu leh Hla, YMA chanchinbu, Hruaitu (YMCA magazine) leh adt te tihlutu an ni a. An essay tha ber berte pawh heng chanchinbu hoah hian kan hmu a ni. Souvenir leh Magazine tichhuak apiangin an sawm awl lo a. Thuziak chhuanawm tak tak an pe thei zel a ni.
Humorist tha an ni ve ve a. Kum tam tak chhung chu Mizo mipuite an lo nuihtir tawh a. Fiamthu lam hawi ziak an awm ve nual a. Anni pahnih hi an danglam deuh. Mi dang ziak hi chu a nuihzatthlak dan hi a ro fo a, mi tam tak tan phei chuan a mak zawk fo. Anni humor hi chu a situation-ah te leh tawngkam danglam tak mai an zehah te a innghat a. Nakinah pawh miin lo la chhiar se, finna nei pangngai an nih chuan an nuih la tiza thei tur a ni deuh zel a ni. PL Liandinga humour phei chu miin Phd lak nan an hmang ta hial a ni.
Social commentator tha an ni a. An thuziak leh an thusawi hmangtein Mizo hnam an thlir a. Mizo hnam awm dan tur an ngaihtuah a. An suangtuahna puan chhuah hian mi tam tak a lo kaihhruai tawh thin. A chang chuan kan ngei a, a chang chuan an sawi chu a dik kan ti a, a chang chuan an huaisen kan ti a, a chang chuan an sawi mak te pawh kan ti a. Kan rilru an khawih che pha tlat a ni. A chang chuan min tithinrim a, a chang chuan, min chawk tho a. Hemi kawngah hian an langsar dun hle a ni.
Letlingtu (Translator) chhuanawm tak an ni ve ve a. MWA-in Translation Book of the year a thlan thin chu an lo dawng ve tawh bawk. Vanneihtluanga hian, Hnehna Hla do bu hi bu 9 zet a tichhuak tawh a. Nun kawng tha ber, Nun duhawm zawk tihte pawh a let bawk a. Pu PL Liandinga hian, Shakespeare-a thawnthute min lehlinsakin, Arabian Nights Full Volume a letling a. Sherlock Holmes bu kim a letling a. Sherlock Holmes a buaipui hian kum 23 emawni chauh a la ni. Tom Sawyer te, The Lost Horizon te leh bu dang dang a let bawk a. Kan Mizo literature an tihausa a, kan khawthlir min tihzau sak a ni. Lehlin kawngah phei chuan, PL Liandinga hum luah hi a ropui hle a. Hemi kawnga a sulhnu min hnutchhiahte hi a chhuanawm hlawm hle. Miin an lei duh ang tih ai chuan, kan hnam tawngin awm ve se tihna vanga a lehlin te a ni thin. A rei ang a, kan ngai hlu deuh deuh ang.
Pu Vanneihtluanga hi fiction writer tha a ni a. Thawnthu tawi tha zet zet a ziak a. Nang lo chu tihte chu mi tam tak lungtilengtu a ni a. Lamkhuang te, Thunderbird te chu a ngaihnawm piah lamah ngaihtuah a tithui. Pu Khuma te phei chu, a nat hian kan lo na ve ngat ngat a ni a tih theih ang chu. Drama lamah a inhmang a, Musical Drama lamah pawh sulhnu chhuanawm tak tak a nei. A ram pum dengchhuak khawp a awm nual a ni.
Vanneihtluanga hian film thawnthu ziah a nei nual a. PL Liandinga pawh a essay ngaihnawm tak, Eng kan ti nge keini chhung hi, tih chu film-ah siam a ni a, a hit viau bawk.
Vanneihtluanga hi hla phuahtu langsar tak a ni bawk a. Pathian hla tha tak tak, Mizo thalaite hla duh deuh deuh eng emaw zat a phuah a bawk a. Ani hi chu Thu leh Hla lamah hian a inhmang zau leh zual hle a ni.
PL Liandinga hi MWA OB te pawh a lo ni tawh a. 1987-a Thu leh Hla kutpui hman a nihin, a tlangval lai a ni a. Chumi tuma chawimawite kawmtu chu a ni a. Kum 39 hnuah Thu leh Hla kutpuiah chawimawi a lo ni ve ta a ni.
An pahnih hian, Mizo Academy of Letters-in Book Of the Year an thlan thinah lawmman an tum thin bawk. Mizo Thu leh Hla tana an inphalna leh a insenso thinna hi kan hriat tharsak te pawh a tha awm e.
Chanchinbu lamah an lo inhmang ve ve tawh a. Tuna Mizo daily lian ber Vanglaini hi Tluangte hnamte leh Vanneihtluanga bultan a ni a. Vanneihtluanga hian a hming a phuah a. A chhuahtirh lamah phei chuan Column te pawh a lo nei tawh thin. Chung hunah lai chuan kum 21 emaw chauh la ni. Tunah hian PL Liandinga hian column a nei ve mek thung. All india Radio-ah an lo thawk ve ve tawh a. PL Liandinga hian 1978 khan Zangkhua tih chanchinbu a lo siam tawh a. Vannneihtluanga hian, 2001 atang khan Lengzem Chanchinbu tichhuak tanin, kum 25 vel chhung khawlchhutin a tichhuak a. Mi tam tak ngaihtuahna kaihhruaitu a ni. Lengzem chanchinbu vanglai tak tak phei chuan mi lar hi an duh duh an siam thei emaw tih tur khawpa powerful a ni. PL Liandinga hi Central YMA hruaitu a nih laia YMA Chanchinbu mumal lo taka awm mek siam tha a, siam lian a, hlep neia siamtu a ni.
An kutchhuakte hi zirlai bu hrang hrangah zir a ni a. Sap tawnga lehlinte a ni bawk a. Vanneihtluanga thawnthu “Lamkhuang” chu Mizo tawng atanga Sap tawnga lettu Margaret L. Pachuau chuan, Central Institute of Indian Languages (CIIL), Hyderabad-in a sponsor Muse India (literary e-magazine) buatsaih, India ram pum huap letlingtu in-elna (Fiction in Translation)-ah khan November 2008 khan Pakhatna Lawmman (1st Prize) a lo lakpui a ni.
- KHARNA
Anni pahnih hi kum tam tak chhung kan hnam awi tlei a, chawi liantu zingah an tel a. Kum 20 pelh awrha atangin ngaihtuahna puitling neiin, hnam tana tangkai tur an buaipui tawh a ni. (Tunlai Thalaite pawh hian, puitling te hi kan inti har a, Rintlak tura awm maite pawh kan la harsat.An ni pahnih hi kan entawn tur an ni ang)Kan ngaihtuahna an kaihruai a, chik zawka thil ngaihtuah thei turin min fuihin min pui a. Min tihlimin, min tilungleng a. Khawvel tukverhah min dahtirin, khawvel ram dang literature kan ban phakah an chhawp a. Kan hnam tan lunghlu pawimawh tak an ni. An hlutna ang hian kan zahthiam tawk lo fote hian ka hre thin. Bible sawi ang chuan, mihring dam chhung hun chawhnu lam an lo hmang ve ta a. An damlai ni chawhnu thlang her hunah chawimawi theiha an awm hi kan lawmpui a. Kan zinga an la awm chhung hian, anmahni ngaihhlutna hi i lantir deuh deuh ang u.