Aizawl: Home Minister K. Sapdanga chuan remna leh muanna hi amaha lo awm ngawt a nih loh avangin thawhchhuah leh duat taka vawnhim chhunzawm zel a, vawiina miten naktuka mite hnena hlan chhawn zel tur a nih thu a sawi.
Aizawl Young Men’s Christian Association (YMCA) chuan World Peace Day, 2026 chu Ningani khan Regional Institute of Paramedical & Nursing Sciences (RIPANS)-a an hmang a. He huna khuallian K Sapdanga chuan, remna leh muanna chu chhungkua, school, kohhran leh mi mal tina atanga intan a nih thu sawiin, “Kan tawngkam hmanin remna a hring thin,” a ti.
“Remna hi tihpalh thila neih a awm ngai lo va, a tuaka tuak chhuah chi a ni. Rambuai kan nih titawp tura a man kan pek tamziate kha theihnghilh hauh loh tur a ni,” tiin tu leh fate hnenah nghet taka rochun turin uar takin hrilhfiah zel turin kalkhawmte a chah.
Mihring rilru leh nun khawharna, leh technology thiamna hmanga sualna hluar chho mek chungchang sawiin K Sapdanga chuan, “Heng hmelmate hi hmachhawn turin remhriatna leh thiamna te kan tihpun ve zel a ngai a ni,” a ti a. YMCA leh khawtlang hruaitute chu nun khawharna laka thalaite chhan chhuaka kawng dik kawhhmuhtu leh remna lei dawhtu zawka tang tur leh, tualchhung changkanna leh hun mil zela inher rem zel tura hmahruaitu nihna hlen chhuak tura fuihin, mihring nunkhua chhertu pawimawh an nih thu a sawi bawk.