Aizawl: Pathianni chawhma dar 9 leh dar 10 inkar vel khan Lawngtlai district-a Chawngte C-ah tualthahna thlengin, Lokhi Mala (38) chuan a pasal, Bipin Kumar Chakma (45) chu an in chhungah chempuiin a sat hlum a. Police-te hian a hmunah tualthattu hi a hriamhrei hman nen an man nghal a ni.
Thu dawn danin, Bipin Kumar-a te chhungkua hi an in midang luah chhawn tir a, mi in luah leh chhawngin Chawngte C-ah zu leh beer zuarin an khawsa thin a. Bipin Kumar-a hi tun hnaiah anmahni Pick-up truck hmangin Silchar-ah zu la turin a kal a, Silchar-ah hian tu tih hriat lohten a pawisa leh zu lakte an laksak vek hnuah an kidnap tiin a chhungte hnenah a lo sawi tawh a ni.
Bipin Kumar-a hi a fapa nen Silchar atanga lo haw chhoin Chawngte C an thlena in an luh hlim hlawtah a nupui hian a lo sat zui ta mai nia sawi a ni a. Lokhi Mala hian in chhungah chem nen tan a lo khawh tlat avangin thenawm hnaihten pawh ngam mai lovin police an ko a, police hi lutin nupui chem ken lai hi an chhuhsak a, a pasal Bipin Kumar-a hi a lo thi tawh a ni.
Tualthahna hmun hi Lunglei Forensic Science Laboratory (FSL) team pawhin thleng thuaiin, case chhui zui zel a nih theih nan evidence leh thil tul dangte an enfiah bawk.
Lokhi Mala-i hian eng vanga a pasal lo bei ta mai nge a nih tih hi police-ten an chhui mek a ni.