Aizawl: MNF Treasurer Lalruatkima chuan sorkar mek ZPM-in mipui phurrit a siam hrang hrangte chhawk zangkhai tur leh Mizo nationalism chawi nung turin MNF an inbuatsaih thu a sawi.
Thawhtannia MNF Hnam Run-a chhung inkhawmah thu sawiin Lalruatkima chuan, Mizo hnam, ram leh sakhua a him a, zalenna sang ber neih a nih theih nan MNF-in zalenna a sual tih a sawi a. Mizo hnam pasaltha leh martarte avanga hnam zahawm an nih thu sawiin, nationalism tel lova Mizo hnam leh Mizoram kaihhruai a pawi theih thu leh Shillong buaina pawh a ram neitute ram leh hnam humhimna kawnga an tlai vang a nih thu a sawi.
Remna Thuthlungin a ken tel Article 371G-in a huam FCA Act, 2023 chu ZPM sorkarin a adopt-a, halral thil hlana an hlan ta mai chu pawi a tih thu a sawi a. Remna thuthlung bawhchhe hmasa ber sorkar an nih thu sawiin, thangtharten ZPM sorkar an la dem tur thu leh Chief Minister-in Remna Thuthlung a sawi bawrhbang chu pawi a tih thu a sawi bawk.
Lalruatkima chuan MNF sorkar lai chuan Covid-19 hripui karah pawh ni 100 inhlawhnaah mipuite ni 100-ah ni 100 an inhlawh thei tih sawiin, thawktute hlawh tihtam leh a hun taka pek a nih thu leh March 2024 thlenga an hlawh tur tihfelsak sa a nih thu a sawi a. ZPM sorkar hnuaiah erawh ni 100 inhlawhna thawktute thla thum leh thla nga hlawh an lak loh fo thu leh thawktute an lainatawm a, MNF sorkar an ngai ngawih ngawih nia a hria thu a sawi.
“Retheite phurrit buhfai man a let a tih to leh te, school upgradation tawh hnuhhniam leh te, electric smart meter kalphung ennawn te a tul dawn a ni,” a ti bawk.