Aizawl: ZPM Adviser, AMC Mayor H. Lalremtluanga chuan ram rorelna mawhphurhna petu Pathian chu theihnghilh loh a pawimawh thu a sawi.
ZPM Party Office-a Thawhtannia chhung inkhawmah thu sawiin H Lalremtluanga chuan Mizoram mipuiten kum 30 chuang hlemhletna leh kalphung dik tawk lo kara hmahruaitu tha an mamawh avanga pawl hrang hrangten mahni nihna dah thaa ZPM an din hnuah, chung lam hnathawh a lang chiang hle tih a sawi a. Kum 2023 inthlan a lo thlen meuh khan ram siam that duhna aurawl hmun tinah a ri a, Pathianin hruaitu tha tak tak pein kalphung thar hmel a lo lang ta tih a sawiin, “Hei vang hian Zohnahthlak zawng zawng leh thalaite thlengin ram siam thatnaa tel châkna leh beiseina sang tak nen ZPM hi an thlir mek a ni,” a ti.
Ram rorelnaa Pathian ram tun din thupuia neitute tana inenfiah a tul thu sawiin Lalremtluanga chuan, mahni inen thar a, her rem ngaih huna her rem a, hruaitu huapzo leh zaikhata luan hram hram a pawimawh thu a sawi a. General Election-a hnehna an chan hlima hlimna leh rilru put hmang mawi tak kha theihnghilh lova ropui leh nawmsak duh luata chung lam pawi sawi theih a nih avanga mi tin inenfiah reng a tul thu a sawi bawk.
Mayor chuan hna thawk tha viau mah se ram rorelnaa Pathian ram tun din an ngaihthah si chuan ropui anga lang pawh nasa taka a sawp thut theih thu a sawi a. Thuawihna tel lova thil tih ringawt chu Lalpa tan rimchhia a nih theih avang leh chunglam venthawnna tel lova tal a nih chuan roreltu tur dang an awm duh mai dawn avangin hun tha a awm lai ngei hian insiam thaa tan la thara inlungrual taka hma pan zel turin party mipui a chah a ni.