Aizawl: Chief Minister Lalduhoma hovin Irrigation & Water Resources Department (IWRD) thuam chak dan tur sawi ho a ni.
Nilainia CM Conference Hall-ah sawihona hunah chief minister chuan department tam tak, kum rei tak chhung thawktu indaih lohna avanga tlu chhe mai thei dinhmun a awm te chu sorkarin a ngaihven hle thu a sawi.
IWRD pawh kum 19 kal ta atanga a dinhmun ngai renga a la awm avangin leh tun hnaia hmalakna hrang hrang a ngah tak avangin, sorkar chuan department dangte dinhmun hrereng chungin a harsatnate hi a ngaithla hmasa a ni, a ti.
IWRD hi tun hmain Minor Irrigation ti a hriat a ni thin a, tunah erawh chuan Irrigation Development chauh ni lovin River Basin Planning, Springshed Development, Integrated Water Resources Management, Hydrological Data Management, Flood Management & Warning, Multipurpose Reservoir, leh Ground Water Development thlengin Project lian tak tak a khawih tawh avangin Technical support nasa zawk a mamawh tawh hle tih sawi a ni.
He hunah hian IWRD bakah GAD, DP&AR, leh Finance Department aiawhte leh Minister PC Vanlalruata te an tel a ni.