Bangladesh-ah sentut avangin naupang 1,002 vel an thi tawh niin an ram damdawi in thuneituten an sawi a, khawvela a len nasat ber a ni mek.
Nilaini khan Directorate General of Health Services (DGHS)-a hotute chuan March thlaa a darh atang khan mi 1,87,484-in an vei tawh tih an sawi.
Sentut hi natna hlauhawm tak, khawsik leh taksa na thlen thei niin a enkawlna damdawi bik a la awm lo va. A tuat naah chuan thluak khawih leh thawk tibuai thei a ni.
A invenna erawh awmin dose hnih lak ngai a ni a. Invenna pek tha loh nausenten an kai awlsam a, a natna an tidarh thei bawk a. Tun tuma a len hian a tir lama kai 80% chuang chu naupang kum nga hnuai lam an ni.
US Centers for Disease Control & Prevention (CDC) chuan mi maktaduai 179 vel chenna Asia chhim lam rama sentut leng mek hi khawvel a nasat ber tum a ni tih a sawi.
Dhaka-a Institute of Epidemiology, Disease Control & Research director hlui, Professor Mahmudur Rahman-a chuan Reuters news agency hnenah ram chhunga a len dan chu ngaihtuah phak bak a nih thu a sawi.
“Ka hriat chinah Bangladesh-ah hetiang taka naupangin sentut an thihpui tam hi a la awm ngai lo va, kum khat chhunga heti taka vei an tam hi a la awm ngai lo bawk a. Dinhmun hrehawm takah a awm a, a lungchhiatthlak lai ber chu a thite naupang an ni hi a ni,” a ti.
WHO leh UNICEF chuan an ram politic chiri-ah Prime Minister Sheikh Hasina-i paih thlaa kum 2024 leh 2025 chhunga invenna pek beihpui thlak, immunisation programme a kal chak loh vang niin an ngai.
Thawhtanni khan Bangladeshi Health Minister Sardar Husain-a chuan parliament-ah invenna damdawi an tlakchham vangin duh angin a kalpuio theih loh niin a hrilh ve bawk.
April thla khan ram pumah hmanhmawh taka invenna pek beihpui thlakna, emergency vaccination drive kalpuiin naupang maktaduai 18 pek an ni tawh a; mahse, naupang maktaduai li vel erawh pek an la ni lo niin thuneituten an sawi.
DGHS thupuangtu, Zahid Raihan-a chuan, “An vei lohna turin an taksaa ngaia neihtirna kan tuh hman lo,” tiin AFP news agency hnenah a sawi a, team-in naupang pek hmaihte an dap mek zel tih a sawi bawk.
“Sentut hi hmeh mih theih a ni lo va, kan tum chu thihpui tihtlem a ni a. Kan naupangte hi invenna kan pe zel ang,” a ti.
Sentut a len mek lai hian dengue avangin damdawi in a indaih lo hle bawk a. Mi 45,000 chuang dengue avangin damdawi ina dah awmin Thawhlehni kha dah luh leh thihpui an tam ber ni a ni nghe nghe.