Aizawl: Health Minister Lalrinpuii chuan mihring cheng zat atanga chhutin Mizoram chu India-a cancer vei tamna ber a ni mek a; chuvangin, Mizorama chhungkua zawng zawngte vaihlo leh a kaihhnawih tel lohna chhungkua din theuh tum turin a sawm.
Zirtawpnia Directorate of Health & Medical Education Auditorium, Aizawla State Anti-Tobacco Day vawi 13-na neihnaa he thu hi sawiin Health Minister chuan, zuk leh hmuam dona kawngah chak zawka ke an pen theih nan mipui chhiah tlingkhawm — cess atangin hma thar lak tumin ruahmanna an siam mek thu a sawi bawk.
Kum 2013 atang khan Mizoram hi India rama State Anti-Tobacco Day hmang hmasa ber leh awm chhun niin, kum tin September 11 hian uar takin a hmang thin a ni.
Global Youth Tobacco Survey – 4 (GYTS-4) atanga a lan danin Mizoram chu India ramah kum 15 chin chunglam zinga vaihlo hmang nasa ber pahnihna (58.7%) leh zirlai naupang kum 13-15 inkar zinga hmang nasa ber (58%) a ni.
National Health Mission (NHM) leh Indian Society on Tobacco and Health, Mizoram te tangkawp buatsaih he hun hi NHM Mission Director Dr. R. Lalchhuanawma chuan a kaihruai a. He hunah hian rampum huap inelna ‘ToFEI – School Challenge’ 2025-a lawmman pakhatna dawngtu, PM Shri Govt. Kawrthah Primary School-1 leh Consolation Prize dawngtu Govt. Leitlangpui Higher Secondary School-te hnenah lawmman hlan nghal an ni.
State Anti-Tobacco Day hi Aizawl bakah district hrang hrangah District Tobacco Control Cell te kaihhruaina hnuaiah hman a ni bawk.